ދޮޅު މަސް ދުވަހުގެ ބަންދަކަށް ފަހު މާދަމާ ދިރާސީ އާ އަހަރުގެ ކިޔެވުން ފެށޭއިރު، މިއީ އަހަރުތަކެއް ފަހުން ޖެނުއަރީ މަހުގައި ކިޔެވުން އަނެއްކާވެސް ފެށިގެންދާ އަހަރުކަން ފާހަގަކޮށްލަން ޖެހެއެވެ.
މާދަމާ ސްކޫލްތައް އަލުން ހުޅުވޭއިރު، ސަރުކާރުގެ 218 ސްކޫލްގައި 77000 ތައުލީމް ހާސިލް ކުރަމުން ދާނެއެވެ.
ސްކޫލްގެ ތައްޔާރީތަކާއި ގުޅޭގޮތުން ދައުލަތުގެ މީޑިއާއަށް މައުލޫމާތު ދެއްވަމުން މިނިސްޓަރު ވިދާޅުވީ، މާދަމާ ސްކޫލްތައް ފަށަން ވާއިރު، އެ މިނިސްޓްރީގެ ތެރެއިން ކުރަން ޖެހޭ މަސައްކަތްތަކާއި، ސްކޫލްގެ މާހައުލުގައި ކުރަން ޖެހޭ މަސައްކަތްވެސް ފުރިހަމަ ކަމާއެކު ދަރިވަރުންގެ އުނގެނުމަށް އެއްވެސް ވަރެއްގެ ގޮންޖެހުންތަކެއް ކުރިމަތިނުވާ މިންވަރަށް ތައްޔާރު ކުރެވިފައިވާ ކަމަށެވެ.
ދިރާސީ އާ އަހަރު މާދަމާ ފަށާއިރު، އަތޮޅުތަކުގެ ސްކޫލްތަކުން މާލެ ސަރަހައްދުގެ ސްކޫލްތަކަށް 15،000 އަށް ވުރެ ގިނަ ދަރިވަރުން ބަދަލުވެފައިވާ ކަމަށް އެޑިއުކޭޝަން މިނިސްޓްރީން ވަނީ ބުނެފަ އެވެ.
އެގޮތުން އަތޮޅުތަކުން މާލެ ސަރަހައްދުގެ ސްކޫލްތަކަށް 1،530 ދަރިވަރަކު ބަދަލުވުމަށް އެދިފައިވާއިރު މާލެ އިން ހުޅުމާލޭގެ ސްކޫލްތަކަށް 836 ދަރިވަރުން ބަދަލުވެފައިވާ ކަމަށާއި އަތޮޅުތަކުގެ ރަށްތަކުން ގްރޭޑް 1 އަށް 3،042 ދަރިވަރުން ވަނުމަށް އެދިފައިވާއިރު މާލެ ސަރަޙައްދުގެ ސްކޫލްތަކުގައި ގްރޭޑު 1 އަށް ވަނުމަށް 1،748 ދަރިވަރުން އެދިފައިވާ ކަމަށް މިނިސްޓްރީން ބުނެ އެވެ.
އަތޮޅުތަކުން މާލެ ސަރަހައްދުގެ ސްކޫލްތަކަށް ބަދަލުވާ ދަރިވަރުން އަހަރުން އަހަރަށް އިތުރުވަމުންދާ އިރު، ހުޅުމާލޭގެ ފޭސް ދޭއްގައި މި ދިރާސީ އާ އަހަރަށް އާ ސްކޫލެއް ވެސް ހުޅުވަން އަންނަނީ ތައްޔާރުވަމުންނެވެ. އެގޮތުން ޝަހީދު އަލީ ސްކޫލަށް ވަނުމަށް އެދި މިހާތަނަށް 1،900 އެއްހާ ދަރިވަރުން ހުށައަޅާފައިވެ އެވެ.
ދިރާސީ އާ އަހަރުގެ ކިޔެވުން މާދަމާ ފަށާއިރު، ދަރިވަރުންނަށް މިދިޔަ އަހަރުގެ ބޮޑު ޗުއްޓީ ދިނީ ކުރިން އޮތް ގޮތަށް ޑިސެމްބަރު މަހު އެވެ. ކޮވިޑް 19އާ ގުޅިގެން އެ ބަދަލު ގެނައީ 2021 ވަނަ އަހަރު އެވެ. ބެލެނިވެރިން އެދުމުގެ މަތިން ރައީސް ޑރ. މުހައްމަދު މުއިއްޒު އެ ބަދަލު ގެންނަވައި ޑިސެމްބަރުގައި ބޮޑު ޗުއްޓީ ލިބޭ ގޮތަށް ބަދަލު ކުރެއްވުމުން، އެއީ ޑިސެމްބަރުގައި ޗުއްޓީ ލިބުނު ފުރަތަމަ އަހަރެވެ.
