ސަރުކާރު ހިންގާ ޕާޓީ، ޕީއެންސީގެ މާފަންނު ދެކުނު ދާއިރާގެ ކެމްޕެއިން ޖަގަހަ ހުޅުވުމަށް ބޭއްވި ޖަލްސާގައި ފަސްޓް ލޭޑީ ވިދާޅުވީ، ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތީ ވަކި ސިޔާސަތުތަކަކާ އެކު، ރައްޔިތުންނަށް ހިދުމަތް ކުރެއްވުމަށް ކަމަށެވެ.
ސާޖިދާ ވިދާޅުވީ، މި ސަރުކާރު ދަނީ ރަނގަޅު ސިޔާސަތެއްގައިކަން ސިޔާސީ ގޮތުން ބެލިއަސް ކޮންމެ މީހަކަށް އެނގޭނެ ކަމަށެވެ. އެހެންކަމުން މިއަދު ބޭނުންވަނީ ރަނގަޅު ކިޔަވައިގެން ތިބި ކައުންސިލަރުންތަކެއް ކަމަށާއި ސަރުކާރާއެކު މަސައްކަތް ކުރާނެ ބަޔަކު ކަމަށް ވެސް އެކަމަނާ ވިދާޅުވިއެވެ.
ރައީސްގެ އަނބިކަނބަލުން ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބުގައި ރައްޔިތުންނަށް ފައިދާވާނެ މަސައްކަތްކޮށްދޭނެ ކެނޑިޑޭޓުން އިންތިހާބުކުރުން ވަރަށް މުހިއްމުކަމަށެވެ. އަދި އެކަމަށްޓަކައި ރައްޔިތުން ބޭނުންވާ ކަންކަން ސަރުކާރާއި ހަމައަށް ގެެނެސްދޭނެ ކައުންސިލްތަކެއް ބޭނުންވާނެކަމަށާއި، އެހެންކަމުން ސަރުކާރުން އެއްބާރުލުން ދޭނެ ކެނޑިޑޭޓުން އިންތިޚާބުކޮށްދެއްވުމަށް ރައީސްގެ އަނބިކަނބަލުން އެދިވަޑައިގެންނެވި އެވެ.
