ސިޓީ ކައުންސިލްގެ ކޮމިއުނިޓީ އެންގޭޖްމަންޓް ޔުނިޓުން އާންމުކުރި ރިޕޯޓުގައިވާ ގޮތުން، މިދިޔަ އަހަރުގެ ޖެނުއަރީ އެކަކުން 31 ޑިސެމްބަރުގެ ނިޔަލަށް ޖުމްލަ 31,131 މައްސަލައަކަށް އެ ޔުނިޓުން ވަނީ ޖަވާބުދާރީވެފަ އެވެ. މީގެ ތެރެއިން 29,350 މައްސަލަ އެއްކޮށް ނިންމާފައިވާއިރު، މައްސަލައިގެ ބާވަތުން އިތުރަށް ފޮލޯއަޕް ހަދަންޖެހޭ 1,781 މައްސަލައެއް ހިމެނެ އެވެ. އަދި ގަވާއިދާ ހިލާފުވި 874 ފަރާތަކަށް ނަސޭހަތް ދީފައިވާއިރު، 483 ފަރާތެއް ވަނީ ޖޫރިމަނާކޮށްފަ އެވެ.
ދެވަނައަށް އެންމެ ގިނައިން ބަލާފައި ވަނީ އާންމު ރައްކާތެރިކަމާ ގުޅޭ މައްސަލަަތައް ކަމަށް ކައުންސިލުން ބުންޏެވެ. އެގޮތުން މިސްކިތްތަކާއި މައިޒާންތައް އަދި ޕާކުތައް ބަލައި ޗެކްކުރުމާ ގުޅޭ 8557 މައްސަލައެއް ބަލާފައި ވެއެވެ. އަދި ތިންވަނައަށް ވެސް އެންމެ ގިނައިން ބަލާފައި ވަނީ އާންމު ރައްކާތެރިކަމާ ގުޅޭ މައްސަލަތައް ކަމަށާއި މަގުގެ ޕޭޕްމަންޓް، ކާނު، މަގުގެ ގައުތައް، ނޫނީ ތާރު ނެއްޓި ހަލާކުވެފައި ހުރުމާ ގުޅޭ 1133 މައްސަލައެއް ބެލި ކަމަށް ވަނީ ބުނެފަ އެވެ.
އޭގެ އިތުރުން، އާންމު ޝަކުވާތަކުގެ ތެރޭގައި ފުރާޅުން ނުވަތަ ދިޔަދޮވިން އަދި އެއާ ކޮންޑިޝަން އައުޓްޑޯ ޔުނިޓުތަކުން މަގުމައްޗަށް ފެން ލީކުވުމުގެ 1,131 ޝަކުވާއެއް ރިޕޯޓްކޮށްފައި ވެއެވެ. މާލެ ސިޓީގެ މޭޔަރުކަމާ އާދަމް އާޒިމް ހަވާލުވެވަޑައިގެންނެވި ފަހުން، މިފަދަ މައްސަލަތައް ހައްލުކުރުމަށް އެކި ކަންކަން އަންނަނީ ކުރައްވަމުންނެވެ.
އެގޮތުން އަމަލީގޮތުން މިފަދަ ސަރަހައްދުތަކަށް އާޒިމް ޒިޔާރަތްކުރައްވައި، މަސައްކަތްތައް ކުރިއަށްދާ ގޮތް ބައްލަވަމުން ގެންދަވާކަން ފާހަގަކުރެވެ އެވެ.
