މިކަމަށް ހައްލެއް ހޯދުމަށް ބޭސްވެރިކަމުގެ ގޮތުން އެކި ފަރުވާތައް ހުރި ނަމަވެސް، ގޭގައި ފަސޭހައިން ތައްޔާރުކޮށްލެވޭ ގުދުރަތީ ފަރުވާއަކުން ވެސް މިކަމަށް ބޮޑު ހައްލެއް ލިބިދާނެ ކަމަށް ސައިންސްގެ ދިރާސާތަކުން ދައްކައެވެ. އެގޮތުން ސައިންސްވެރިން އެންމެ ބޮޑަށް ބާރުއަޅަނީ "ރޯޒްމެރީ އޮއިލް" ނުވަތަ ރޯޒްމެރީ ފަތުން ތައްޔާރުކުރާ ތެޔޮ ބޭނުންކުރުމަށެވެ.
މިކަމާ ގުޅޭގޮތުން 2015 ވަނަ އަހަރު ހަދާފައިވާ ހާއްސަ ދިރާސާއެއްގައި، އިސްތަށި ފަޅުވަން އާންމުކޮށް ބޭނުންކުރާ ބޭހެއް ކަމަށްވާ "މިނޮކްސިޑިލް" އާއި ރޯޒްމެރީ ތެޔޮ އަޅާކިޔާފައިވެއެވެ. މި ދިރާސާގެ ނަތީޖާ ދެއްކި ގޮތުގައި، ހަ މަސް ދުވަސް ވަންދެން ގަވާއިދުން މި ތެޔޮ ބޭނުންކުރުމުން، ބޭސް ބޭނުންކުރި މީހުންނާ އެއްވަރަށް ރޯޒްމެރީ ތެޔޮ ބޭނުންކުރި މީހުންގެ ބޮލުގައި ވެސް ވަނީ އިސްތަށި ފަޅާފައެވެ. އަދި ބޭހުން ލިބޭ "ސައިޑް އިފެކްޓްސް" ނުވަތަ ހަންގަނޑު ހިރުވުން ފަދަ އުނދަގޫތައް ތެޔޮ ބޭނުންކުރި މީހުންނަށް ކުޑަކަން ފާހަގަކުރެވުނެވެ.
ރާއްޖޭގައި މި ފަރުވާ ތައްޔާރުކުރުމަށްޓަކައި ބޭނުންވާނީ ރޯޒްމެރީ އެސެންޝަލް އޮއިލް އާއި ކާށި ތެލެވެ. ތައްޔާރުކުރާނެ ގޮތަކީ، މޭޒުމަތީ ސަމުސަލެއްގެ ކާށި ތެލުގެ ތެރެއަށް 5 ތިކި ރޯޒްމެރީ ތެޔޮ އެޅުމަށްފަހު ރަނގަޅަށް އެއްކޮށްލުމެވެ. އެއަށްފަހު ބޮލުގެ ހަމުގައި އުނގުޅައި، އިނގިލިތަކުން މަޑުމަޑުން މަސާޖުކުރާނީއެވެ. މިގޮތަށް ހަފްތާއަކު ދެތިން ފަހަރު ބޭނުންކުރުމުން އެދެވޭ ނަތީޖާ ފެންނާނެ ކަމަށް މާހިރުން ބުނެއެވެ.
ނަމަވެސް، މާހިރުން ހަނދާންކޮށްދޭ މުހިންމު ނުކުތާއެއް ވެއެވެ. އެއީ ގުދުރަތީ ފަރުވާތަކުން ނަތީޖާ ފެންނަން ވަގުތު ނަގާނެ ކަމެވެ. ދިރާސާތަކުން ދައްކާ ގޮތުގައި ފާހަގަކުރެވޭ ވަރުގެ ބަދަލެއް ފެންނަން މަދުވެގެން 6 މަސް ދުވަސް ނަގާނެއެވެ. އެހެންކަމުން ކެތްތެރިކަމާއެކު ގަވާއިދުން ފަރުވާ ކުރިއަށް ގެންދިއުމަށް ޑޮކްޓަރުން އިރުޝާދު ދެއެވެ.
