މި ގަނޑުވަރު ބިނާކުރެއްވީ ކުރީގެ ޝެއިޚް އަބްދުލް އަޒީޒް އަލް ގާސިމީއެވެ. 1985 ވަނަ އަހަރު މިތަނުގެ މަސައްކަތް ނިންމައި، އާއިލާއާ އެކު ދިރިއުޅެން ވަތް ފުރަތަމަ ރޭ ވެސް ވަރަށް ބިރުވެރި ކަންތައްތަކެއް ތަޖުރިބާ ކުރަން ޖެހުނެވެ. އޭގެ ތެރޭގައި ފަރުނީޗަރުތައް އަމިއްލައަށް ހަރަކާތް ކުރުމާއި، ފާރުތަކުގައި ބާރުމިނެއްގައި އެއްޗެހި ޖެހޭ އަޑު އިވުން ހިމެނެއެވެ. އަދި ކުޑަކުދިން ރޯ އަޑާއި، ބޮޑެތި މީހުން ހަޅޭއްލަވާ އަޑު އިވި، ގަނޑުވަރުގެ ބޮކިތައް އަމިއްލައަށް ނިވިދިއްލޭ މަންޒަރު ފެނުނު ކަމަށް އެ ސަރަހައްދުގެ މީހުން ކިޔައިއުޅެއެވެ.
އެންމެ ރެއަކު އެތަނުގައި ހޭދަކުރުމަށްފަހު، އެ އާއިލާއިން އެތަން ދޫކޮށް ދިޔައީއެވެ. އޭގެ ފަހުން އެތައް ޒަމާނެއް ވަންދެން އެ ގަނޑުވަރު ހުރީ ފަޅަށެވެ. އެ ސަރަހައްދުން ދަތުރުކުރާ މީހުންނަށް ރޭގަނޑު ގަނޑުވަރުގެ ކުޑަދޮރުތަކުން ކުޑަކުދިން ބަލަން ތިބޭ މަންޒަރު ފެންނަ ކަމަށާއި، އެތެރެއިން ގޮތް ނޭނގޭ އަޑުތައް އިވޭ ކަމަށް ބުނެފައިވެއެވެ. މިކަމާ ގުޅިގެން ގިނަ ބަޔަކު ގަބޫލުކުރަނީ އެތަނަކީ ޖިންނީންގެ ބޮޑު އާއިލާއެއް ވަޒަންވެރިވެފައިވާ ތަނެއް ކަމަށެވެ.
ނަމަވެސް، 2019 ވަނަ އަހަރު މި ގަނޑުވަރު ވަނީ އާންމުންނަށް ޒިޔާރަތް ކުރެވޭ ތަނެއްގެ ގޮތުގައި ހުޅުވާލާފައެވެ. މިތަން ބަލަހައްޓާ ފަރާތުން ބުނާ ގޮތުގައި އެތަން ސާފުކޮށް، މަރާމާތުކޮށްފައިވާއިރު، މިހާރު އެތަނުން އާދަޔާ ހިލާފު ކަމެއް ފެންނާކަށް ނެތެވެ. އެހެންނަމަވެސް، އެތަނަށް ޒިޔާރަތްކުރާ ބައެއް ޓޫރިސްޓުން އަދިވެސް ބުނަނީ ގަނޑުވަރުގެ ބައެއް ކޮޓަރިތަކަށް ވަނުމުން ފިނިގަނޑެއް އިހުސާސް ކުރެވޭ ކަމަށާއި، މީހަކު ފަހަތުގައި ހުންނަހެން ހީވާ ކަމަށެވެ.
މިއަދު މި ގަނޑުވަރު ވެފައިވަނީ ޔޫއޭއީގެ އެންމެ މަޝްހޫރު ޓޫރިސްޓް މަންޒިލްތަކުގެ ތެރެއިން އެއް ތަނަށެވެ. އެތަނުގެ ރީތި ކުރެހުންތަކާއި އަގުބޮޑު މާބްލްތައް ބަލާލުމަށް މީހުން ދިޔަ ނަމަވެސް، އެތަނާ ގުޅިފައިވާ ބިރުވެރި މާޒީގެ ވާހަކަތަކަކީ އަދިވެސް މީހުންގެ ހިތްތަކުން ފިލައިގެންދާ ވަރަށްވުރެ ބިރުވެރި ވާހަކަތަކެކެވެ.
