މި ރަށާ ގުޅޭގޮތުން ދެކެވޭ އެންމެ މަޝްހޫރު އެއް ވާހަކައަކީ އެ ރަށުގައި ހުންނަ ބަހްލާ ފޯޓް ނުވަތަ ބަހްލާ ކިއްލާގެ ވާހަކައެވެ. ޔުނެސްކޯގެ ދުނިޔޭގެ ތަރިކައިގެ ލިސްޓުގައި ހިމެނޭ މި ކިއްލާއަކީ އިންސާނުންނަށް ނުއުފުލޭ ވަރުގެ ބޮޑެތި ހިލަތަކުން ހަދާފައިވާ ތަނެކެވެ. އެ ރަށުގެ މީހުން ގަބޫލުކުރާ ގޮތުގައި 12 ކިލޯމީޓަރުގެ ދިގު މި ކިއްލާގެ ފާރު، ޖިންނިން ވަނީ އެންމެ ރެއެއްގެ ތެރޭގައި ބިނާކޮށް ނިންމާލާފައެވެ. އަދި މިއަދު ވެސް އެ ކިއްލާގެ ބައެއް ސަރަހައްދުތަކުން ރޭގަނޑު ގޮތް ނޭނގޭ އަޑުތައް އިވޭ ކަމަށް އެ ރަށު މީހުން ބުނެއެވެ.
ބަހްލާގެ ރައްޔިތުންނަކީ ޖިންނި ޝައިތާނުންނާ ގުޅޭ ވާހަކަތައް ދައްކަން ޖެހިލުންވާ ބައެކެވެ. އެހެންނަމަވެސް މަޝްހޫރު ވާހަކަތަކުގެ ތެރޭގައި، އެ ރަށުގައި އުޅޭ ސިހުރު ހަދާ މީހުންނަށް އިންސާނުން ޖަނަވާރަށް ބަދަލުކުރުމުގެ ބާރު ލިބިފައިވާ ކަމަށް ކިޔައިއުޅެއެވެ. ހާއްސަކޮށް ހައިނާ ފަދަ ޖަނަވާރަށް މީހުން ބަދަލުވެ، ރޭގަނޑު ރަށުތެރޭގައި ދުވެ އުޅޭ ކަމަށް ޒަމާނުއްސުރެ އެ ރަށު މީހުން ގަބޫލުކުރެއެވެ. މި ސަބަބާ ހުރެ، އިރުއޮއްސުމަށްފަހު އެ ރަށުގެ މީހުން ގެއިން ބޭރަށް ނުކުމެ އުޅުމަކީ ވަރަށް މަދުން ނޫނީ ނުކުރާ ކަމެކެވެ.
މީގެ އިތުރުން، އެ ރަށުގައި ޗޭނު ޖަހައި ބިންމަތީގައި ހަރުކޮށްފައިވާ ގަހެއްގެ ވާހަކައަކީ ވެސް ޓޫރިސްޓުންގެ މެދުގައި މަޝްހޫރު ވާހަކައެކެވެ. ބުނެވޭ ގޮތުގައި އެ ގަސް އެގޮތަށް ބަނދެފައި ހުންނަނީ، ޗޭނު ނައްޓާލައިފިނަމަ އެ ގަސް އަމިއްލައަށް ހިނގައިގަނެ، ތަންތަނަށް ދަތުރުކުރާތީއެވެ. މިފަދަ ބިރުވެރި ކަންތައްތަކާ ހެދި، އޮމާންގެ އެހެން ހިސާބުތަކުގެ މީހުން މި ރަށުގެ ނަން ކިޔަން ވެސް ބައެއް ފަހަރު ޖެހިލުންވެއެވެ.
ނެޝަނަލް ޖިއޮގްރަފިކް ފަދަ ބޮޑެތި ޗެނަލްތަކުން ވެސް މި ރަށުގެ ހަގީގަތް ހޯދުމަށް ގޮސްފައިވެއެވެ. މިއަދު މިއީ ޓޫރިސްޓުން ޒިޔާރަތްކުރާ ތަނަކަށް ވިޔަސް، ބަހްލާގައި ހިނގާ ކަމަށް ބުނާ މި ބިރުވެރި ހާދިސާތަކަކީ ހަމައެކަނި ވާހަކަތަކެއް ކަމަށް ނުވަތަ ހަގީގަތެއް ކަމަށް ކަނޑައަޅަން އެއްވެސް މީހަކަށް ނޭނގެއެވެ. އެނގޭހާ ވެސް ކަމަކީ، އެ ރަށަށް ވަނުމުން ނާމާން އިހުސާސެއް ކުރެވޭ ކަމަށް ގިނަ މީހުން އިއްތިފާގުވާ ކަމެވެ.
