.ބިޒްނަސް ސެންޓަރ ކޯޕަރޭޝަން (ބީސީސީ) ބުނިގޮތުގައި .ޔުނައިޓެޑް އަރަބް އެމިރޭޓްސްގެ ޝާރުޖާގައި، 31 ޖެނުއަރީ އިން ފެބްރުއަރީ 1 އަށް ކުރިއަށްދާ އޮންޓަޕްރިނިއަރޝިޕް ފެސްޓިވަލް (އެސް.އީ.އެފް) 2026 ގައި ރާއްޖެ ތަމްސީލްކުރާ ވަފުދުގައި އިސްކޮށް ހަރަކާތްތެރިވަނީ ބިޒްނަސް ސެންޓަރ ކޯޕަރޭޝަން (ބީސީސީ) އިންނެވެ.
ބީސީސީއިން ބުނިގޮތުގައި މި ފެސްޓިވަލްގައި، ރާއްޖޭގެ ޓެކްނޮލޮޖީ ދާއިރާގައި ފާހަގަކޮށްލެވޭ ތިން ވިޔަފާރިއެއް ދަނީ، ބީސީސީ މެދުވެރިކޮށް ބައިވެރިވަމުންނެވެ. އެއީ ޕައި ނެޓްވޯކްސް، ޖަވާބު އަދި އީޒެޕް އެވެ. މި ފެސްޓިވަލްގައި ބައިވެރިވުމުގެ މައިގަނޑު މަގްސަދަކީ ދިވެހި އީޖާދީ މަސައްކަތްތައް ސަރަހައްދީ ފެންވަރުގައި ދައްކާލުމާއި، އިސްތިރާތީޖީ ގުޅުންތައް ގާއިމުކުރުމެވެ.
މީގެ އިތުރުން، ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ބައިނަލް އަގުވާމީ މާކެޓްތަކުން ފުރުސަތު ހޯދައިދިނުމަކީ ވެސް މި ދަތުރުގެ މުހިންމު ބޭނުމެއް ކަމަށް ބީސީސީ އިން ބުނެ އެވެ. މި ފެސްޓިވަލްގެ ތެރެއިން ކުރިއަށްދާ އެގްޒިބިޝަންތަކާއި ނެޓްވޯކިންގް ސެޝަންތަކުގެ އެހީގައި، ޓެކްނޮލޮޖީގެ ދާއިރާއިން އެއްބާރުލުން ދިނުމާއި އިންވެސްޓްމަންޓްތައް ހޯދުމުގެ ފުރުސަތުތައް ދިވެހި ވިޔަފާރިތަކަށް ފަހިވެގެންދާނެއެވެ.
މި ފެސްޓިވަލަކީ މެދުއިރުމައްޗާއި އެ ސަރަހައްދުގެ ގައުމުތަކުގެ ސްޓާޓްއަޕްތަކާއި، އީޖާދީ މަސައްކަތްތަކާއި، އަދި އެކި ގައުމުތަކުގެ މެދުގައި ގުޅުން ބަދަހިކުރުމަށް ބާއްވާ އެންމެ ފާހަގަކޮށްލެވޭ އެއް ހަރަކާތެވެ. މި ހަރަކާތުގައި އިންވެސްޓަރުންނާއި، ސިޔާސަތު އެކުލަވާލާ ފަރާތްތަކުގެ އިތުރުން ވިޔަފާރީގެ ދާއިރާ ކުރިއަރުވާ ފަރާތްތަކުން ބައިވެރިވާކަމަށް ބީސީސީން ބުނެ އެވެ
ބީ.ސީ.ސީ އިން މި ފެސްޓިވަލްގައި ބައިވެރިވެފައިވަނީ ދިވެހި ވިޔަފާރިތައް ކުރިއެރުވުމަށާއި، ޕްރައިވެޓް ސެކްޓަރުގެ ވާދަވެރިކަން އިތުރުކުރުމަށް އެ ކޯޕަރޭޝަނުން ކުރަމުންދާ މަސައްކަތުގެ ދަށުން ކަމަށް އެ ކޯޕަރޭޝަނުން ބުނެ އެވެ. މިކަމުގެ ސަބަބުން ދިވެހި ވިޔަފާރިތައް ބައިނަލްއަގުވާމީ އީޖާދީ ވިއުގަތަކާ ގުޅުވައިދިނުމަށް ބޮޑު އެހީއަކަށް ވެގެންދާނެއެވެ.
ޝާރުޖާ އެންޓްރަޕްރިނިއަރޝިޕް ފެސްޓިވަލަކީ އެތައް ހާސް ބައިވެރިންނާއި އެތައް ސަތޭކަ ސްޓާޓްއަޕްތަކެއް ބައިވެރިވާނެ ހަރަކާތަކަށް ވާތީ، މިއީ ދިވެހި ކުންފުނިތަކަށް ސަރަހައްދީ ފެންވަރުގައި ކުރިއަށް ދިއުމަށް ލިބޭ ފަހި ފުރުސަތެކެވެ.
