އިނގިރޭސިވިލާތުގެ ކެމްބްރިޖް ޔުނިވާސިޓީގެ ސައިންސްވެރިންނާއި ނިއުޓްރިޝަން މާހިރުން ހާމަކުރާ ގޮތުގައި، އިންސާނާ ފަލަވަނީ ވަކި ގަޑިއެއްގައި ކާތީއެއް ނޫނެވެ. ފަލަވަނީ ދުވާލެއްގެ މައްޗަށް މީހާގެ ހަށިގަނޑަށް ބޭނުންވާ ވަރަށްވުރެ ގިނައިން "ކެލޮރީސް" އެތެރެވުމުންނެވެ. ހަގީގަތަކީ ރޭގަނޑު 8 ޖަހާއިރު ކާ ބަތް ތަށްޓާއި މެންދުރު 12 ޖަހާއިރު ކާ ބަތް ތަށީގައި ހަކަތަ ހުންނަނީ އެއްވަރަކަށެވެ.
މިކަމާ ގުޅޭގޮތުން މަޝްހޫރު ޑައިޓީޝަން ޕޫޖާ މަކީޖާ ސޯޝަލް މީޑިއާގައި ހިއްސާކުރި މައުލޫމާތެއްގައި ބުނި ގޮތުގައި، ހަށިގަނޑަށް ގަޑިއެއް ނޭނގޭނެއެވެ.
ނަމަވެސް މާހިރުން ފާހަގަކުރާ އެހެން ކަމެއް އެބައޮތެވެ. ރޭގަނޑު ބަތް ކެއުމުން ފަލަވާކަމަށް ހީވަނީ، ގިނަ މީހުން ރޭގަނޑު ކެއުމަށްފަހު އެއްވެސް ހަރަކާތެއް ނުކޮށް ނިދަން އޮންނާތީއެވެ. ދުވާލު ވަގުތު މީހާ ހުންނަނީ ހަރަކާތްތެރިކޮށެވެ. އެކަމަކު ރޭގަނޑު ގިނައިން ބަތް ކައިގެން، ޓީވީ ބަލަން ނުވަތަ ފޯނު ކުޅެން އޮންނަނަމަ، އެ ހަކަތަ އަނދައިގެން ނުދާނެއެވެ.
ޑައިޓީޝަނުން ލަފާދެނީ ރޭގަނޑު ބަތް ކެއުމަކީ މައްސަލައެއް ނޫން ކަމަށެވެ. ނަމަވެސް ސަމާލުވާންޖެހޭ ކަންތައްތަކެއް އެބަހުއްޓެވެ. އެއް ކަމަކީ ނިދުމުގެ 2 ނުވަތަ 3 ގަޑިއިރު ކުރިން ކެއުމެވެ. އަދި ބަތް ކާއިރު، ތަށީގެ ދެބައިކުޅަ އެއްބައި ތަރުކާރީން ފުރާލުމާއި، ބަތް އަޅާ މިންވަރު މަދުކުރުމެވެ. މި އުސޫލުން ކާނަމަ ރޭގަނޑު ބަތް ކެޔަސް ފަލައެއް ނުވާނެއެވެ.
