އޭނާ ބުނި ގޮތުގައި، ގިނަ ވަގުތު ނުކައި ހުރުމުގެ ސަބަބުން ހަށިގަނޑުގެ އިންސިއުލިން މަސައްކަތްކުރާ މިންވަރު ރަނގަޅުވެ، ލޭގައި ހަކުރު ހުންނަ މިންވަރު ކޮންޓްރޯލް ކުރުމަށް އެހީތެރިވެދެއެވެ. މީގެ ސަބަބުން ހަށިގަނޑުގެ މަސައްކަތްތައް ހަރުދަނާވެ، ބަރުދަން ލުއިކުރުމަށް ބޭނުންވާ މީހުންނަށް މިއީ ވަރަށް ރަނގަޅު ފުރުސަތެކެވެ.
ނަމަވެސް ބަރުދަން ލުއިކުރުމަށް ރޯދަ މަސް ބޭނުންކުރާއިރު، ރޯދަ ވީއްލާ ގަޑީގައި މާ ގިނައިން ކެއުމާއި ތެޔޮ އެއްޗެހި ބޭނުންކުރުމުން ދުރުހެލިވާން ޖެހޭނެ ކަމަށް އޭނާ ބުންޏެވެ.
ރޯދަ ހިފުމުގައި އެންމެ އިސްކަމެއް ދޭންޖެހޭނީ އަމިއްލަ ސަލާމަތަށް ކަމަށް ޑޮކްޓަރު ފާހަގަކުރިއެވެ. ހަކުރު ބަލި ހުންނަ މީހުންނާއި، ގަވާއިދުން ބޭސް ބޭނުންކުރާ މީހުން ރޯދަ ހިފުމުގެ ކުރިން ޑޮކްޓަރެއްގެ ލަފާ ހޯދަންވާނެއެވެ. މާ ބޮޑަށް ވަރުބަލިވެ ބޯ އެނބުރުން ފަދަ ކަމެއް ދިމާވާނަމަ، ރޯދަ ދޫކޮށްލުމަކީ ދުޅަހެޔޮކަމަށްޓަކައި ކުރަންޖެހޭ ކަމެއް ކަމަށް އޭނާ ބުންޏެވެ.
ޑޮކްޓަރު އިތުރަށް ބުނި ގޮތުގައި ދީނުގައި ވެސް އޮންނަނީ އަމިއްލަ ނަފްސު ރައްކާތެރިކުރުމެވެ. އެހެންކަމުން ބަލި މީހުންނާއި ސިއްހީ ގޮތުން ހާއްސަ ހާލަތްތަކުގައި ތިބޭ މީހުން، ރޯދަ ހިފުމުގައި އަމިއްލަ ހަށިގަނޑަށް އަންނަ ބަދަލުތަކަށް ސަމާލުވުން މުހިންމެވެ. މިގޮތަށް ސަމާލުކަން ދީގެން ރޯދަ ހިފުމުން، އޭގެ ފުރިހަމަ ސިއްހީ ފައިދާ ހަށިގަނޑަށް ލިބިގެންދާނެއެވެ.
