މި މައްސަލަ ފެށުނީ ލަންޑަންގައި އޮތް ބާފްޓާ އެވޯޑު ހަފުލާގެ ރެޑް ކާޕެޓުގައި އާލިއާއާ ކުރި ސުވާލަކަށް ޖަވާބު ދެމުން އޭނާ ކުޑަކޮށް މަޑުޖެހިލުމުންނެވެ. އެ ވަގުތު އޭނާއަށް މަލާމާތްކުރި ނަމަވެސް، އާލިއާ ބުނީ އެ ވަގުތު މަޑުޖެހިލީ ފިލްމެއްގެ މަންޒަރެއް ހަނދާންކުރަން ކަމަށެވެ. މިލާންގައި އޭނާ ފެނިގެންދިޔައީ "ގުޗީ" ބްރޭންޑުގެ އެމްބެސެޑަރެއްގެ ގޮތުގައި، ކަޅު ކުލައިގެ ލެދާ ކޯޓަކާއި ބޮޑު އައިނެއް އަޅައިގެން ވަރަށް ތަފާތު "އަލްފާ" ލުކެއްގައެވެ.
އާލިއާގެ މި ތަފާތު ސްޓައިލަށް ސޯޝަލް މީޑިއާގައި ބޮޑު ސަމާލުކަމެއް ލިބިފައިވާއިރު، ގިނަ ބަޔަކު ބުނަނީ މިއީ އޭނާގެ ކުރިއަށް އޮތް ޖާސޫސީ ފިލްމު "އަލްފާ" އާ ގުޅުވައިގެން ގެނެސްފައިވާ ބަދަލެއް ކަމަށެވެ. މީގެ އިތުރުން ސަންޖޭ ލީލާ ބަންސާލީގެ ބޮޑު ފިލްމު "ލަވް އެންޑް ވޯ" އިން ވެސް ރަންބީރު ކަޕޫރު އަދި ވިކީ ކޯޝަލް އާއެކު އާލިއާ ފެނިގެންދާނެއެވެ. މިއީ މިއަހަރު ބޮލީވުޑްގައި ނެރޭނެ އެންމެ ބޮޑު ދެ ފިލްމު ކަމަށް ރިޕޯޓުތައް ބުނެއެވެ.
