އީރާނުގެ ތަސްނީމް ނޫސް އޭޖެންސީން ރިޕޯޓްކޮށްފައިވާ ގޮތުގައި އެކަމަނާ އަވަހާރަވެފައި ވަނީ އިސްރާއީލާއި އެމެރިކާއިން ހޮނިހިރު ދުވަހު ދިން ހަމަލާއަށް ފަހު ލިބުނު ޒަހަމްތަކަށް ފަރުވާދެމުން ދަނިކޮށެވެ.
އުމުރުން 86 އަހަރުގައި އަވަހާރަކޮށްލި ޚާމަނާއީގެ އަނބިކަނބަލުން މަންސޫރާ އަވަހާރަވި އިރު އުމުރަކީ 78 އަހަރެވެ. އެ ދެ ބޭފުޅުން ކައިވެނިބައްލަވައިގަތީ 1964 ވަނަ އަހަރު އެވެ.
ހޮނިހިރު ދުވަހު ދިން މި ހަމަލާތަކުގައި ޚާމަނާއީގެ އިތުރުން އީރާނުގެ ސަލާމަތީ ބާރުތަކުގެ އިސްވެރިންނާއި، ޚާމަނޭއީގެ ދަރިކަލަކާއި، ދަނބިދަރިކަލަކާއި އަދި ކާފަދަރިކަލަކު ވެސް ވަނީ މަރުވެފަ އެވެ. މިއީ 1979 ވަނަ އަހަރުގެ އިސްލާމީ އިންގިލާބަށްފަހު އީރާނުގެ ލީޑަޝިޕަށް ލިބުނު އެންމެ ބޮޑު އެއް ގެއްލުމެވެ.
އީރާނުގެ ރައީސް މަސްއޫދު ޕެޒެޝްކިއަން މި ހަމަލާ ކުށްވެރިކުރައްވައި ވިދާޅުވީ މިއީ ހިންގި "ބޮޑު ޖަރީމާއެއް" ކަމަށެވެ. އަދި 40 ދުވަހުގެ ހިތާމަ ފާޅުކުރުމުގެ މުއްދަތުގެ އިތުރުން، ސަރުކާރުން ވަނީ ރަސްމީ ބަންދު ހަތް ދުވަސް ވެސް އިއުލާންކޮށްފަ އެވެ.
އިސްރާއީލާއީ އެމެރިކާއިން ހޮނިހިރު ދުވަހު ވަނީ ކުއްލި ގޮތަކަށް އީރާނަށް ވަަރުގަދަ ހަމަލާތަކެއް ދޭން ފަށައިފަ އެވެ. އިޒްރޭލާއި އެމެރިކާއިން ބުނަމުންދަނީ ހަމަލާތައް އަދިވެސް ކުރިއަށް ގެންދާނެ ކަމަށެވެ.
ރައްދުގައި އީރާނުން އަންނަނީ، އިސްރާއީލުގެ އިތުރުން، މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާ ދެމުންނެވެ. އޭގެ ތެރޭގައި ގަތަރާއި ކުވޭތާއި ސައުދީ އަރަބިއާއާއި ޔޫއޭއީގައި ހުންނަ މަރުކަޒުތައް ހިމެނެ އެވެ.
