100 ވުރެ ގިނަ މީހުން އަތުން ފައިސާ ނަގާ އުމްރާއަށް ނުދެވޭނެކަން އުމްރާވެރިންނަށް އަންގާފައިވަނީ 'އަލް އަބްރާރު ޕްރައިވެޓް ލިމިޓެޑް' ގްރޫޕުން ނެވެ.
އެ ގްރޫޕުން އުމްރާއަށް ދާން ފައިސާ ދެއްކި މީހުން ބުނީ ދަތުރު ކެންސަލްވިކަން ގްރޫޕުން އެންގީ ރޭ ފުރަން އޮއްވާ އިއްޔެ މެންދުރު ފަހުގެ ވަގުތެއްގައިކަމަށެވެ. އެމީހާ ބުނީ މީގެ ކުރިން ގުރޫޕުން މައުލޫމާތު ދެމުން އައީ މިހާރު މެދުއިރުމަތީ ހިނގާ ހަނުގާރަމައިގެ ސަބަބުން ފްލައިޓްތައް ކެންސަކްވި ނަމަވެސް އެ ގްރޫޕްގެ ދަތުރަށް އެއްވެސް ބަދަލެއް ނާންނަކަމަށެވެ. އެހެންނަމަވެސް ކުއްލިއަކަށް ދަތުރު ކެންސަލްކުރިކަން އެނގީ ހަނގުރާމައާ ގުޅުވާކަމަށްވެސް އެ މީހާ ބުނެފައިވެއެވެ.
ސީއެމްއެމަށް އެނގިފައިވާ ގޮތުގައި އަލް އަބްރާރު ޕްރައިވެޓް ލިމިޓެޑް ގްރޫޕުން ވަނީ އުމްރާވެރިން ބައިތިއްބާ ހޮޓަލަށް ފައިސާ ދައްކާފައެވެ. އެހެންނަަމަވެސް ސައުދީ ގެ އެޖެންޓަށް ފައިސާ ދައްކަން ތަކުރާރުކޮށް އެނގުމުންވެސް ފައިސާ ދައްކާފައި ނެތުމުން އެ ގްރޫޕަށް ވިސާ ލިބިފައެއް ނުވެެއެވެ. ސައުދީ އެޖެންޓަށް ގިނަ އަދަދެއްގެ ފައިސާ ދައްކަން ޖެހޭކަންވެސް ވަނީ އެނގިފައެވެ. އަބްރާރު ގްރޫޕުން ވަނީ ރޯދައިގެ ފަހު 15 މީހުން އުމްރާއަށް ގެންދިޔުމަށް ބޮލަކަށް 45000 ރުފިޔާ ނަގާފައިވާކަންވެސް ވަނީ އެނގިފައެވެ.
އިސްލާމިކް މިނިސްޓްރީން ބުނީ މި މައްސަލަ މިނިސްޓްރީގެ ސަމާލުކަމަށް އައިސްފައިވާކަމަށެވެ. އަދި މައްސަލަ ބަލަމުން އަންނަކަމަށާއި ފިޔަވަޅު އަޅަންޖެހޭ ފަރާތެއްވާނަމަ ފިޔަވަޅު އަޅާ މައްސަލަ ހައްލުކޮށްދޭނެކަަމަށް އިސްލާމިކް މިނިސްޓްރީން ވަނީ ބުނެފައެވެ.
މެދު އިރުމަތީ ހަނގުރާމައާއި ގުޅިގެން އަބްރާރު ގްރޫޕުން ދާ މީހުން ފިޔަވާ އެހެން ދިވެހި އުމްރާވެރިންގެ ދަތުރުތައް މިހާތަނަށް ކެންސަލްވެފައެއް ނުވެއެވެ. އެހެންނަމަވެސް ގަލްފު އެއާގައި ދަތުރުކުރަން ތައްތާޔާރުވެފައިވާ ބައެއް ދިވެހިންގެ ފުރުން ވަނީ ލަސްވެފައެވެ. އެ ގްރޫޮޕްތަކުން އަންނަނީ އެހެން އެއާލއިންތަކަށް ބަދަލުކޮށް މި ހަފްތާ ނިމުމުގެ ކުރިން އުމްރާއަށް ފައިސާ ދެއްކި މީހުން ސައުދީއަށް ގެންދިޔުމުގެ މަސައްކަތް ކުރަމުންނެވެ.
