ސަރުކާރުން ޓެކްސީ ހިދުމަތް ފަށަން ސަރުކާރުން މިހާތަނަށް ވަނީ ތާފާތު އެތައް ތާރީހުތައް ދީފައެވެ.
ޓެކްސީ ލައިން ފުރަތަމަ ފަށަން އެންމެ ފުރަތަމަ ދިން ތާރީހަކީ މިދިޔަ އަހަރުގެ ޖުލައި މަހުގެ ފުރަތަމަ ހަފުތާގައެވެ. އެހެންނަމަވެސް އޭގެ ފަހުން ޖޫން މަހަސް ތާރީހު ބަދަލުކޮށް އޭގެ ފަހުން އަނެއްކާވަނީ އެ ތާރީހު އޮގަސްޓަށް ބަދަލުކުރިއެވެ.
ސަރުކާރަށް ދެ އަހަރު ފުރުން ފާހަގަކުރުމަށް މިދިޔަ ނޮވެމްބަރުގައި ސޯޝަލް ސެންޓަރުގައި ބޭއްވި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ އެމަނިކުފާނު ވައުދުވީ ގޮތަށް ޒަމާނީ ވަރަށް ފެންވަރު ރަނގަޅު ޓެކްސީތަކާއި އެކު މާލޭ ސަރަހައްދުގައި ޓެކްސީ ލައިންގެ ހިދުމަތް މި ފެބްރުއަރީ މަހު ފަށާނެކަމަށެވެ.
ޓްރާންސްޕޯޓް މިނިސްޓްރީއިން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީން ވިދާޅުވީ އެމްޓީސީސީއިން މަސައްކަތްކުރަނީ މިމަހުގެ 18ގައި ޓެކްސީ ލައިންގެ މަސައްކަތް ނިންމައި އީދަށް، ޓެކްސީ ލައިންގެ ހިދުމަތް ފެށުމަށްކަމަށެވެ. މީ ޓެކްސީ ހިދުމަތް ފަށަން ސަރުކާރުން ދިން ފަސްވަނަ ތާރީހެވެ.
މިނިސްޓަރު އަމީން ވިދާޅުވީ އެމްޓީސީސީން ޓެކްސީތައް ގެންނަނީ ދެ ބެޗަކަށް ބަހާލައިގެންކަމަށެވެ. އެގޮތުން ދެ ބެޗުގެ ޓެކްސީތައްވެސް ނިމިފައިވާކަން ފާހަގަކުރައްވަމުން އަމީން ވިދާޅުވީ ފުރަތަމަ ބެޗުގެ ޓެކްސީތައް މިއަދު ސްރީލަންކާގެ ޕޯޓަށް ވަންނާނެ ކަމަށެވެ. އަދި އެ ޓެކްސީތައް މިމަހުގެ 11 ވަނަ ދުވަހު ރާއްޖެ އަންނާނެ ކަމަށްވެސް މިނިސްޓަރު ވިދާޅުވިއެވެ.
ޓެކްސީ ލައިންގެ ދެވަނަ ބެޗު ގެންނަނީ ޗައިނާއިން ކަމަށްވެސް މިނިސްޓަރު ވިދާޅުވިއެވެ. އެ ޓެކްސީތައްވެސް މިހާރު އުޅެނީ ރާއްޖެ ގެނައުމުގެ މަގުމަތީގައި ކަމަށާއި އަންނަ ހުކުރު ދުވަހު ރާއްޖެ ވަންނާނެކަމަށް މިނިސްޓަރު އަމީން ވިދާޅުވިއެވެ. އަދި ޕްލޭންކޮށްފައި ވަނީ ފުރަތަމަ ދެ ބެޗުގައި 150 ކާރު ގެނައުމަށް ކަމަށް މިނިސްޓަރު ވިދާޅުވިއެވެ.
