ލަންކާގެ ޚާރިޖީ ވަޒީރު ވިޖިތާ ހެރަތު ވިދާޅުވީ، 180 ފަޅުވެރިންގެ ޖާގައިގެ އެ ބޯޓުގައި ވަރަށް ބޮޑަށް ޒަޚަމްވެފައިވާ 32 މީހުން ސަލާމަތްކޮށްފައިވާ ކަމަށެވެ. އަދި އެ މީހުން ލަންކާގެ ދެކުނުގެ ސަރަހައްދުގައި ހުރި ކަރަޕަތިޔާ ހޮސްޕިޓަލަކަށް ގެންގޮސްފައިވާ ކަމަށް އޭނާ ވިދާޅުވިއެވެ.
އެ ހާދިސާ ހިނގީ ލަންކާ ސަރަހައްދުގެ ކަނޑުގައި ކަމުން ލަންކާ ކަނޑުގެ ސިފައިންނާއި ވައިގެ ސިފައިންގެ ފަރާތުން ވަގުތުން އެކަމަށް އިޖާބަދީފައިވާ ކަމަށް ކަނޑުގެ ސިފައިންގެ އޮފިޝަލަކާ ހަވާލާދީ ލަންކާގެ ނޫހެއް ކަމަށްވާ ޑެއިލީ މިރާއިން ރިޕޯޓުކޮށްފައިވެ އެވެ.
މަނަވަރުގެ ކޮމާންޑަރާއި ބައެއް އިސް އޮފިސަރުން ސަލާމަތްވި މީހުންގެ ތެރޭގައި ހިމެނޭއިރު، އެ މީހުން ސްރީލަންކާގެ ނޭވީއަށް މައުލޫމާތު ދީފައިވާ ގޮތުގައި އެ މަނަވަރަށް ހަމަލާދީފައިވަނީ ސަބްމެރިންއަކުންނެވެ.
އެމެރިކާގެ ދިފާއީ ވަޒީރު ޕީޓް ހެގްސެތު މިއަދު ވިދާޅުވީ މިއީ ދެވަނަ ބޮޑު ހަނގުރާމައަށް ފަހު ޓޯޕެޑޯއަކުން ހަމަލާދިން ފުރަތަމަ ފަހަރު ކަމަށާއި އިރާނުގެ މަނަވަރަށް ހަލާކުކޮށްލާފައިވާ ކަމަށެވެ.
ޕެންޓަގަން އިން ބުނީ އެމެރިކާ އާއި އިޒްރޭލުން އީރާނަށް ދޭ ހަމަލާތަކުގެ އެއް މަގްސަދަކީ އީރާންގެ ކަނޑުގެ ސިފައިންގެ ބާރު ނައްތާލުން ކަމަށެވެ.
މި ހާދިސާ ހިނގާފައި މިވަނީ އެމެރިކާ އާއި އިޒްރޭލުން އީރާނަށް ދެމުންދާ ހަމަލާތަކާ ގުޅިގެން ސަރަހައްދީ ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގަ އެވެ.
ސުލްހައިގެ މަޝްވަރާތައް ކުރިއަށް ދަނިކޮށް އެމެރިކާ އާއި އިޒްރޭލުން ގުޅިގެން އިރާނަށް ހަމަލާދޭން ފެށީ މިދިޔަ ހޮނިހިރު ދުވަހެވެ. އޭގެ ފަހުން އިރާނުގެ ސުޕްރީމް ލީޑަރު އަލީ ހާމަނާއީ ވަނީ އަވަހާރަކޮށްލައިފަ އެވެ.
އެމެރިކާ އާއި އިޒްރޭލުން ވަނީ އިރާނުގެ އަންހެން ކުދިން ކިޔަވައި ސްކޫލަކަށް ވެސް ބޮން އަޅައިފަ އެވެ. އެ ހަމަލާގައި މަރުވި ކުޑަކުދިންނާއި މީހުންގެ އަދަދު 165 އަށް މިހާރު އަރައިފި އެވެ. އަދި އިރާނުގެ އެހެނިހެން މަދަނީ އިންފްރާސްޓްރަކްޗާތަކަށް ވެސް އެމެރިކާ އާއި އިޒްރޭލުން ދަނީ ބޮން އަޅަމުންނެވެ.
އެމެރިކާ އާއި އިޒްރޭލަށް ރައްދު ދިނުމުގެ ގޮތުން އިރާނުން ވެސް ދަނީ ހަމަލާތަކެއް ދެމުންނެވެ. އެގޮތުން އިޒްރޭލަށް އަދި އެމެރިކާއިން އަސްކަރީ މަަރުކަޒުތައް އަޅައިގެން އުޅޭ ގައުމުތަކަށް އިރާނުން ވަނީ ހަމަލާތަކެއް ދީފަ އެވެ. އިރާނުން ހަމަލާ ދިން ގައުމުތަކުގެ ތެރޭގައި ސައުދީ އަރަބިއްޔާ، އޮމާން، އުރުދުން، ކުވެއިތު އަދި ޔޫއޭއީ ހިމެނެ އެވެ.
