ޒަމާނީ ފަސޭހަތަކާއެކު، ސްޓެލްކޯގެ ކަރަންޓާއި ގުޅުންހުރި ހުރިހާ ހިދުމަތަކަށް އެދެވޭގޮތަށް ފަރުމާކޮށްފައިވާ މި ޕޯޓަލް އިފްތިތާހުކޮށްދެއްވީ އެކަމަށްޓަކާ ބޭއްވި ހާއްސަ ރަސްމިއްޔާތުގައި ސްޓެލްކޯ ހިންގެވުމާއި ހަވާލުވެވަޑައިގެން ހުންނެވި، ޑެޕިއުޓީ މެނޭޖިންގ ޑިރެކްޓަރު ޑރ. އަލީ އަޒުވަރެވެ.
މި ރަސްމިއްޔާތުގައި ވާހަކަދައްވަމުން ޑރ. އަލީ އަޒުވަރު ވިދާޅުވީ "ވަށަނި"އަކީ ސްޓެލްކޯއިން ފޯރުކޮށްދޭ ހިދުމަތްތައް ލުއިފަސޭހަކޮށް ހޯދުމާއި، ހިދުމަތް ކުރިޔަށްދާގޮތް އަދާހަމަކޮށް އެއް މަންސައަކުން ވަށާޖެހޭ ނިޒާމެއްގެ ތެރެއިން ބޭނުން ކުރެވޭނެހެން ފަރުމާ ކޮށްފައިވާ ޕޯޓަލެއްކަމަށެވެ.
ސްޓެލްކޯއިން އަލަށް ފެށި އޮންލައިން އެ ހިދުމަތަކީ އާންމުން ބަލައިގަންނާނެ އަދި އާންމުންނަށް މިހާރަށް ވުރެ ބޮޑަށް ލުއިފަސޭހަ ވެގެންދާނެ ހިދުމަތަކަށް ވެގެންދާނެ ކަމަށް ވެސް އޭނާ ވިދާޅުވި އެވެ.
