އިޝާން މިހާތަނަށް ހުރީ އެމް.އެމް.އޭ ގެ ހެޑް އޮފް ފައިނޭންސްގެ މަގާމުގައެވެ. އޭނާ އެފްއައިޔޫގެ ވެރިޔަކަށް އައްޔަންކޮށްފައި މިވަނީ އެ މަގާމަށް ކުރިމަތިލާން ހުޅުވާލުމުން ކުރިމަތިލީ މީހުންގެ ތެރެއިން އިންޓަވިއުގައި އެންމެ ގިނަ މާކްސް ލިބިގެންނެވެ.
މީގެ ކުރިން އެ މަގާމުގައި ހުރީ އިސްމާއިލް ސާޖިދު އެވެ. މިދިޔަ ޑިސެމްބަރު މަހުގެ ތެރޭގައި ސާޖިދުގެ މައްޗަށް ޖިންސީ ފުރައްސާރައިގެ ތުހުމަތުކޮށް އޭނާ މަގާމުން ސަސްޕެންޑުކުރުމަށްފަހު މަގާމުން ވަނީ ވަކިކޮށްފައެވެ.
މިދިޔަ އޮގަސްޓް މަހުގެ ފަހުކޮޅު ސާޖިދު އެ މަގާމަށް އައްޔަން ކުރެއްވީ, ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕުގެ ސީނިއާ ޑެޕިއުޓީ ލީޑަރު, އިބްރާހީމް ޝުޖާއު (ޝުޖާ)އަށް ތުހުމަތަކެއް ކުރެވޭ, ފައިނޭންޝިއަލް އިންޓެލިޖެންސް ރިޕޯޓެއް ލީކް ވެފައި ވަނިކޮށް, އެފްއައިޔޫގެ އޭރުގެ ވެރިއަކަށް ހުންނެވި އަބްދުﷲ އަޝްރަފް, މަގާމުން ދުރުކުރުމަށްފަހުއެވެ.
