އަމްޖޭ ބަލިވެ އުޅޭތާ ދުވަސްތަކެއް ވެފައިވާއިރު، އޭނާ ހޮސްޕިޓަލުގައި އެޑްމިޓްކުރީ ފުއްޕާމޭގައި ފެން ހެދުމުގެ ސަބަބުން ހާލަތު އިތުރަށް ގޯސްވުމާ ގުޅިގެންނެވެ. އޭނާއަށް މިހާރު ފަރުވާ ދެމުންދަނީ ހިތުގެ ބަލިތަކަށް ހާއްސަ ޔުނިޓުގައެވެ.
އަމްޖޭއަކީ ދިވެހި ސިނަމާއަށް ގިނަ ހިދުމަތްތަކެއް ކޮށްދީފައިވާ، ގިނަ ބައެއްގެ މަގުބޫލުކަން ހޯދާފައިވާ ފަންނާނެކެވެ. އޭނާ ޑައިރެކްޓްކޮށްފައިވާ މަޝްހޫރު ފިލްމުތަކުގެ ތެރޭގައި "އުދަބާނި"، "މިލަ ހަނދުވަރު"، "ސަނދުރަވިރޭ" އަދި "ބާރައިގެ ފަސް" ފަދަ ފިލްމުތައް ހިމެނެއެވެ. ފިލްމުތަކުގެ ސްކްރީންޕްލޭ ލިޔުމުގައި ވެސް ފާހަގަކޮށްލެވޭ އަމްޖޭ ވަނީ 2006 ވަނަ އަހަރު ފިލްމު ޑައިރެކްޓްކުރުމުގެ ދާއިރާއިން ގައުމީ އެވޯޑު ވެސް ހާސިލްކޮށްފައެވެ.
މީގެ އިތުރުން 2011 ވަނަ އަހަރު ބޭއްވި ފުރަތަމަ ފިލްމު އެވޯޑްސްގައި އެންމެ މޮޅު ޑައިރެކްޓަރުގެ އެވޯޑަށް ވެސް އަމްޖޭ ވަނީ ނޮމިނޭޓްވެފައެވެ. އޭނާ އުފައްދާފައިވާ "ދިން ވޭނުގެ ހިތާމައިގައި" އަދި "ދޮންކަމަނަ" ފަދަ ފިލްމުތަކަކީ ވެސް ދިވެހި ބެލުންތެރިންގެ މެދުގައި ބޮޑު ތަރުހީބެއް ލިބުނު މަސައްކަތްތަކެކެވެ. އަމްޖޭގެ ހާލު ދެރަވި ހަބަރާއެކު ފިލްމީ ދާއިރާގެ ގިނަ ބަޔަކު އަންނަނީ އޭނާއަށް އަވަސް ޝިފާއަކަށް އެދި ދުއާކުރަމުންނެވެ.
