މި މިސްކިތް ބިނާ ކުރީ މީލާދީން 1927 ވަނަ އަހަރު އެވެ. މީ އޭރު ރާއްޖޭގައި ވިޔަފާރިކުރަން އުޅުނު ވޯރާ ވިޔަފާރިވެރިން ބިނާކުރި މިސްކިތެކެވެ. މި ތާރީހަށް ބަލާއިރު މި މިސްކިތް ބިނާކުރިތާ 100 އަހަރު އަންނަ އަހަރު ފުރޭނެއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވީ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާކަމަށެވެ. އަދި އެ މަސައްކަތް މި ރޯދަމަސް ފަހުން ފެށިގެންދާނެކަމަށާއި އެކަމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާކަމަށެވެ. ބަންޑާރަ މިސްކިތް ހެދުމުން މާލެ ގެ ބޮޑެތި ހުރިހައި މިސްކިތެެއް އާވެގެން ދިޔައީކަމަށްވެސް މިނިސްޓަރު ޝަހީމް ވިދާޅުވިއެވެ.
މި މިސްކިތަށް ކުރިން ކިޔާ އުޅުނީ ބަންޑާރަ މިސްކިތެއް ނޫނެވެ. އޭރު މި މިސްކިތަށް އެންމެ ކިޔާ އުޅުނީ "ބުންބާ މިސްކިތް" މި ނަމުންނެވެ. 1927 ގައި މި މިސް އިމާރާތްކުުމަށްފަހު 12 ޖެނުއަރީ 1967 ވަނަ ދުވަހާއި ޖެހެންދެން ބޭނުން ކުރަމުން ދިޔައީ ނުވަތަ ހާއްސަވެފައި އޮތީ ވޯރާ މީހުން ނަމާދުކޮށް ހެދުމަށެވެ.
އެ ދުވަސްވަރު މި މިސްކިތުގެ ގޯތިތެރެރޭގައި ވަރަށް ދޭސީ ގޮތަކަށް ޓިނުން ހަދާފައި މުއްލާ ދިރިއުޅޭނެ ތަނަކާއި އަދިވެސް މި ފާޑުގެ ބައެއް ތަންތަން ހުރިކަމަށްވެއެވެ.
މާލޭގައި އުޅުނު ވޯރާއިން ރާއްޖެ ދޫކޮށް ގޮސް މި މިސްކިތް ބޭނުންނުކޮށް ހުންނަ ފެށުމުން ދައުލަތުން ނިންމެވީ އެތަނަކީ އާއްމުކޮށް ނަމާދުކޮށް އުޅޭ ތަނެއްގެ ގޮތުގައި ހަދާ އަލުން ހުޅުވުމަށެވެ. އެ ގޮތުން އެ މިސްކިތުގެ ގޯތިތެރޭގައި ދިރިއުޅުމަށް ހަދާފައިވާ ތަންތަން ރޫޅާލިއެވެ. މި މަސައްކަތް ފެށީ 1966 ވަނަ އަހަރުގެ ޑިސެމްބަރު މަހުގަ އެވެ.
މި މަސައްކަތް ނިންމާ އާއްމުކޮށް މިސްކިތް ހުޅުވާލީ 12 ޖެނުއަރީ 1967 ގައެވެ. މިސްކިތް ހުޅުވާދެއްވީ ފަޝީލަތުއް ޝައިހް މުހައްމަދު ޖަމީލް އުއްތަމަ ފަނޑިޔާރު މަނިކުފާނެ އެވެ.
މި މިސްކިތުގައި ހުކުރު ކުރަން ފެށީ އަދި އޭގެ ފަހުން އަހަރެއްވާން ގާތްވަނިކޮށެވެ. މިސްކިތުގައި ހުކުރުކުރަން ފެށީ 7 ޑިސެމްބަރު 1968 ގައެވެ.
މިސްކިތުގައި ލައުޑް ސްޕީކަރު ސިސްޓަމެއް ބެހެއްޓީ 9 ފެބަރުއަރީ 1979 ގައެވެ. އެ ލައުޑް ސްޕީކަރު ސިސްޓަމަކީ ލީބިއަން އަރަބި ހާރިޖިއްޔާއިން މާލޭގައި ހުންނަ އެމްބަސީން ހަދިޔާކުރެއްވި އެއްޗެކެވެ.
މި މިސްކިތަށް ބަންޑާރަ މިސްކިތް މި ނަމުން ނަންދިނީ އާއްމުންނަށް މިސްކިތް ހުޅުވާލި ދުވަހުން ފެށިގެންނެވެ.
