ޒިކުރާ މިސްކިތް ތިން ބުރިއަށް އިމާރާތްކުރުމަށް އެސްޖޭ ކޮންސްޓުރަކްޝަނާއި ހަވާލުކޮށް އެކަމުގެ އެއްބަސްވުމުގައި ސޮއިކުރީ މިދިޔަ 2024 ވަނަ ޖެނުއަރީ މަހުގެ 24 ވަނަދުވަހުއެވެ. އެ މިސްކިތް އެސްޖޭއިން އަޅާދެނީ އެ ކުންފުންނީގެ އަމިއްލަ ހަރަދުގައިކަމަށް އިސްލާމިކް މިނިސްޓްރީން އޭރުވަނީ ބުނެފައެވެ.
އަދި އޭގެ ފަސްމަސްދުވަސް ފަހުން 2024 ވަނަ އަހަރުގެ މޭ މަހުގެ 9 ވަނަ ދުވަހު މިނިސްޓަރު ޝަހީމް ވަނީ މާލޭގެ ޒިކުރާ މިސްކިތް އަލަށް އިމާރާތްކޮށް ނިމޭއިރު ހުންނާނެ ގޮތުގެ ކުރެހުންވެސް ދައްކާލާފައެވެ. މިސްކިތުގެ އަމަލީ މަސައްކަތް އެ އަހަރުތެރޭގައި ފެށޭނެކަމަށްވެސް ވިދާޅުވިއެވެ.
އެހެންނަމަވެސް އޭގެ އަހަރެއްހާ ދުވަސް ފަހުން މިއަދު އަނެއްކާވެސް މިނިސްޓަރު ޝަހީމް މީޑިއާތަކަށް ފޮނުއްވި މެސެޖެއްގައި މި ވަނީ ޒިކުރާ މިސްކިތް އަޅަން ދީލަތި އެހީއެއް ހަމަޖެހުނުކަމަށް ހާމަކުރައްވާފައެވެ. އަދި ޒިކުރާ މިސްކިތ ހުރި ތަނުގައި ޒަމާނީ ބޮޑު މިސްކިތެއް އެޅުމަށް އެހީ ދިން ފަރާތުން އެ މިސްކިތުގެ ބިންގާ އެޅުން މި ރަމަޟާން މަހުގެ 27 ވިލޭރޭ ބޭއްވުމަށް އެދޭކަމަށްވެސް މިނިސްޓަރު ޝަހީމް ވިދާޅުވިއެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި 2018 ވަނަ އަހަރު ވެސް ޒިކުރާ މިސްކިތް ހުރި ބިމުގައި މިސްކިތަކާ އެކު 10 ބުރީގެ އޮފީސް އިމާރާތެއް އަޅަން އެސްޖޭއޭ ކުންފުންޏާއި ހަވާލުކުރިއެވެ. އެކަމަކު، އެކަމުގައި ކޮރަޕްޝަން ހިމެނޭކަމަށް އޭސީސީން ބުނުމުން އެ އެއްބަސްވުން މިދިޔަ ސަރުކާރުން ބާތިލުކުރިއެވެ.
އޭރު ޒިކުރާ ހަދަން އެސްޖޭއޭ އާއި ހަވާލުކުރުމުގައި ކޮރަޕްޝަން ހިމެނޭކަމަށް އޭސީސީން ނިންމާ އޭރުގެ އިސްލާމިކް މިނިސްޓަރަކަށް ހުންނެވި ޑރ.އަހްމަދު ޒިޔާދު ބާގިރުގެ މައްޗަށް ރަސްމީ ހައްސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާވެސް ކުރިއެވެ. އެހެންނަމަވެސް އެ މައްސަލަ ދަށުކޯޓުން އޭނާގެ މައްޗަށް ސާބިތު ނުވުމުން ޕީޖީ އޮފީހުން ހައިކޯޓްގައި އިސްތިއުނާފުކުރިއެވެ.
ޒިކުރާ މިސްކިތް އެޅުމަށް އެސްޖޭއާ ހަވާލުކޮށް ޔާމީން ސަރުކާރުގައި އެ ކުންފުންޏަށް ވަނީ އިކުއިޒިޝަންގެ ގޮތުގައި 30 މިލިއަން ރުފިޔާ ދީފައެވެ. އެއްބަސްވުން ބާތިލުކުރުމުން ގެއްލުމުގެ ބަދަލު ހޯދަން އެސްޖޭއިން ދައުވާ ކުރުމުން ދައުލަތުންވެސް ވަނީ އެސްޖޭއަށް ދިން 30 މިލިއަން އަނބުރާ ހޯދަން ދައުވާކުރިއެވެ.
އެހެންނަމަވެސް އެސް.ޖޭ ކޮންސްޓްރަކްޝަނަށް ދައުލަތުން ދެއްކި، ތިރީސް މިލިއަން ރުފިޔާ އަނބުރާ ދައުލަތަށް ނެގުމުގެ ބަދަލުގައި، ހުޅުމާލޭ ދެވަނަ ދިޔަވަހީގައި މިސްކިތެއް ބިނާކުރަން އެކުންފުންޏާއެކު ސަރުކާރުން ފަހުން އެއްބަސްވިއެވެ. އެ އެބަސްވުމުގައި ސޮއިކުރީ 2022 ވަނަ އަހަރުގެ ޖެނުއަރީ 23 ގައެވެ. އެ މިސްކިތުގެ ކުރެހުންތައްވެސް އޭރު ދައްކާލިއެވެ.
