އިލްމުވެރިން ވިދާޅުވަނީ ރޯދައިގެ މައިގަނޑު މަގުސަދަކީ ތަގުވާވެރިވުން ކަމަށާއި ތަގުވާގެ މާނައިގައި، ހެޔޮ އަމަލުކުރުމާއި، އެންމެހައި ފާފަތަކާ ދުރުހެލިވުން ހިމެނޭ ކަމަށެވެ. އަދި ރޯދައަކީ ކެތްތެރިކަމުގެ މަތިވެރި ތަމްރީނެއް ކަމަށާއި ރޯދަވެރިޔާ ކުރުމަށް އާދަވެފައިވާ ދުނިޔެވީ އެދުންތަކާ ނަފުސު ދުރުކުރުމަށް ލިބޭ ތަރުބަވީ ފިލާވަޅެއް ކަމަށެވެ.
މާތް ﷲ ރުއްސުންލެއްވި ޖުންދަބު ބްނު ޖުނާދާ އާއި މުއާޒް ބިން ޖަބަލްގެ އަރިހުން ރިވާވެގެންވެ އެވެ. ކީރިތި ރަސޫލާ ﷺ ހަދީސް ކުރެއްވި އެވެ؛ اتَّقِ اللَّهَ حَيْثُمَا كُنْتَ، وَأَتْبِعْ السَّيِّئَةَ الْحَسَنَةَ تَمْحُهَا، وَخَالِقْ النَّاسَ بِخُلُقٍ حَسَنٍ މާނައީ؛ ތިބާ ވީ ކޮންމެ ތަނެއްގައި، ތިބާ މާތް ﷲ އަށް ތަގުވާވެރި ވާށެވެ! އަދި ކޮންމެ ނުރަނގަޅު އަމަލަކާ ވިދިގެން ހެޔޮ އަމަލެއް ކުރާށެވެ! އޭރުން އެ ނުބައި ކަންތައް ފުއްސަވާނެތެވެ. އަދި ތިބާ މީސްތަކުންނާ އެކުގައި ރިވެތި އަހުލާުގުން މުއާމަލާތު ކުރާށެވެ!
ތިމާވީ ކޮންމެ ތަނެއްގައި ތިމާ ވީ ކޮންމެ ހާލެއްގައި ވެސް ﷲއަށް ބިރުވެތިވެ ތަގުވާވެރިކަން އިސްކުރާނީ މާތް މީހުންނެވެ. އެހެނީ، ﷲ ސުބްހާނަހޫ ވަތައާލާއީ، ކޮންމެ ތަނެއްގައި އަދި ކޮންމެ ހާލަތެއްގައި ތިބާ ވިޔަސް، ތިބާގެ ހާލަތު އެންމެ މޮޅަށް ދެކެދެނެވޮޑިގެންވާ ރަސްކަލާނގެ އެވެ. ތިބާގެ އެއްވެސް ކަމެއް އެކަލާނގެ އަށް ވަންހަނާވެވޮޑިގެން ނުވާ ފަދައިން އުޑުތަކާއި ބިމުގައި ވާ އެއްވެސް ކަމެއް އެކަލާނގެއަށް ވަންހަނާވެވޮޑިގެން ނުވެ އެވެ.
މީގެ ކުރީގެ އުންމަތްތަކަށާއި އަޅުގަނޑުމެންނަށް ވެސް ރޯދަ ފަރުޟުކުރެއްވީ ތަގުވާވެރިވުމަށެވެ. އޭގެ މާނައަކީ އީމަންތެރިކަމުގެ ރޭހުގައި އަޅުގަނޑު ހުރި ހިސާބު ދެނެގަނެ އެއަށް ވުރެކުރިއަރާ ދިޔުމަށް މި މަހުގެ ބޭނުން ހިފުމެވެ.
ރޯދަމަހުގެ ރޯދަ ފަރުޟުކުރެއްވުމުގެ ހިކުމަތް ބަޔާންކުރައްވައި މާތް ﷲ ސުބްހާނަހޫ ވަތައާލާ ވަހީކުރެއްވި އެވެ. ﴿يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ﴾ (البقرة: ١٨٣) މާނައީ: "އޭ އީމާންވެއްޖެ މީސްތަކުންނޭވެ! ތިޔަބައިމީހުންގެ ކުރީގެ މީހުންގެ މައްޗަށް ފަރުޟުކުރެއްވި ފަދައިން ތިޔަބައިމީހުންގެ މައްޗަށް ވެސް ރޯދަ ފަރުޟުކުރައްވައިފި އެވެ. (އެއީ) ތިޔަބައިމީހުން ތަޤުވާވެރި ވުމަށް ޓަކައެވެ."
އިލްމުވެރިންގެ ބަސްފުޅުތަކުން ސާފުވާ ގޮތުގައި ތަގުވާވެރިކަމަކީ އިބާދާތުގެ އިތުރުން އަހުލާގާއި ރިވެތި ސުލޫކާ އަމާނާތްތެރިކަމާއި ތެދުވެރިކަމާއި އަދި، އަނެކާއަށް އިހުތިރާމްކޮށް އަނެކާގެ ހައްގުތަކަށް އަރައިނުގަތުން ކަން ވަރަށް ސާފުކޮށް ކަށަވަރުކޮށްދެ އެވެ.
ތަގުވާވެރިވުމަކީ މާތް ﷲގެ ހަޟްރަތުން ދަރުމަ އާއި ސަވާބަށް އެދިގެން، އަމަލާއި ބަހުން އެކަލާނގެ އަށް ކިޔަމަންތެރިކަން އަދާކުރުމެވެ. މާތްﷲ ގެ ދީނުގައި ހިފަހައްޓައިގެން ތިބެ ތަގުވާވެރިކަން އިތުރުކުރުމަށާއި އެކަލާންގެ އުގޫބާތަށް ބިރުވެތިވުމަށް މި މަސް ނިމުމުގެ ކުރިން ގަދައަޅާ މަސައްކަތް ކުރާށެވެ.
