ޕެޒެޝްކިއަންއާ ހަވާލާދީ އިރާނާއި ބައިނަލްއަގުވާމީ މީޑިއާތަކުން ރިޕޯޓުކުރަމުން އަންނަ ގޮތުގައި އެ ގައުމުގެ އިންޓަރިމް ލީޑާޝިޕް ކައުންސިލުން ވަނީ އަވައްޓެރި ގައުމުތަކަށް ދޭ ހަމަލާތައް ހުއްޓާލަން އިއްޔެ ފާސްކޮށްފަ އެވެ. ޕެޒެޝްކިއަން ވަނީ އަރަބި ގައުމުތަކަށް އެ ގައުމުން ދިން ހަމަލާތަކަށް މައާފަށް ވެސް އެދިވަޑައިގެންފަ އެވެ.
އީރާންގެ ރައްދު ހަމަލާތައް، އަވަށްޓެރި ގައުމުތަކުގައިވާ އެމެރިކާގެ އަސްކަރީ ތަންތަނަށް އަމާޒުކުރި ނަމަވެސް އާންމުންގެ ސަރަހައްދުތަކަށާއި ހަކަތަ އުފައްދާ ކާރުހާނާތަކާއި އެއާޕޯޓްތަކަށް ވެސް އަމާޒުވެ ބޮޑު ހާސްކަމެއް ވަނީ އުފެދިފަ އެވެ. އެކަމާ ހެދި ދަތުރުފަތުރު ހުއްޓުމަކަށް އައިސް ހުރިހާ ކަމަކަށް ވަނީ ބުރޫއަރައިފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އިރާނުން އެއްވެސް ޝަރުތަކާ ނުލާ އަމާންދީފި ނަމަ މެނުވީ މަޝްވަރާ ނުކުރައްވާނެ ކަމަށް އިއްޔެ ވިދާޅުވެފަ އެވެ. މި ދަނޑިވަޅުގައި އެމެރިކާއިން ވަނީ އިޒްރޭލަށް 151 މިލިއަން ޑޮލަރުގެ ހަތިޔާރު ވިއްކުމަށް ހުއްދަ ދީފަ އެވެ. އަދި ކުރިއަށް އޮތް ތަނުގައި މިއަށް ވުރެ ވަރުގަދަ ހަމަލާތަކެއް ދީފާނެ ކަމުގެ އިންޒާރު ވެސް އެމެރިކާގެ އޮފިޝަލުން ވަނީ ދެއްވާފަ އެވެ.
މިދިޔަ ހޮނިހިރު ދުވަހު އިޒްރާއީލް/އެމެރިކާއިން ދިން ވައިގެ ހަމަލާތަކުގައި އީރާނުގެ ރޫހާނީ ލީޑަރު އަލީ ޚާމަނާއީ ވެސް އަވަހާރަކޮށްލާފައިވާއިރު، ޓްރަމްޕް ބޭނުން ވަނީ އޭނާގެ ގޮނޑިކޮއްކޮ ސަރުކާރެއް ގެނައުމަށެވެ. ހާއްސަކޮށް ޚާމަނާއީގެ ދަރިކަލުން މުޖްތަބާ ގެނައުމަކީ އެމެރިކާއިން ބަލައިގަންނާނެ ކަމެއް ނޫން ކަމަށް ޓްރަމްޕް ވަނީ ވިދާޅުވެފައެވެ.
ރައްދުގައި އީރާންގެ ފޮރިން މިނިސްޓަރު އައްބާސް އަރަޣްޗީ ވިދާޅުވީ އީރާނުން އިންތިޒާރުކުރަނީ އެމެރިކާ ސިފައިން އެ ގައުމަށް އަރާނެ ދުވަހަކަށް ކަމަށާއި އޭރުން އެމެރިކާގެ ސިފައިންނަށް ވަރަށް ރަނގަޅު ފިލާވަޅެއް ދޭނެ ކަމަށެވެ.
އީރާނުން ލުބްނާނަށް މިއަދު ދިން ހަމަލާއެއް. - ފޮޓޯ: ރޮއިޓާސް
ހަނގުރާމައިގައި އީރާނުގެ ހާހަކަށް ވުރެ ގިނަ މީހުން މަރާލިއިރު، އިސްރާއީލުން 10 އަށް ވުރެ ގިނަ މީހުން އަދި އެމެރިކާގެ ހަ ސިފައިން ވަނީ މަރާލައިފަ އެވެ.
އީރާނުގެ އަސްކަރީ މަރުކަޒުތަކަށާއި ވެރިންނަށް އަދި ނިއުކްލިއާ ޕްރޮގްރާމަށް އަމާޒުކޮށް އެމެރިކާ އާއި އިޒްރޭލުން މެދުނުކެނޑި ހަމަލާދެމުންދާއިރު، މި ހަމަނުޖެހުންތަކަށް ދެވަނަ ހަފްތާއެއް ފެށިގެންދާއިރު ވެސް މައްސަލައަށް ދާއިމީ ހައްލެއް ފެންނާކަށް ނެތެވެ.
މި ހަމަލާތަކާ ގުޅިގެން މި ސަރަހައްދުގެ ގައުމުތަކުގެ ވައިގެ ސަރަހައްދު ބަންދުކޮށް، ތެލާއި ގޭސް އުފެއްދުން މަދުކުރަން މަޖުބޫރުވެފަ އެވެ. މިއާ ގުޅިގެން އެ ގައުމުތަކަށް ލިބުނު އިގުތިސޯދީ ގެއްލުމުގެ މިންވަރު ގުނަމުން އަންނަނީ ބިލިއަން ޑޮލަރުންނެވެ.
