އެމެރިކާ އާއި އިޒްރޭލު ގުޅިގެން މިދިޔަ މަހުގެ 28 ވަނަ ދުވަހު އިރާނަށް ހަމަލާދިނުމާ ގުޅިގެން އެ ގައުމުން ވަނީ، ދުނިޔޭގެ އެކި ސަރަހައްދުތަކަށް ތެޔޮ އުފުލުމަށް ބޭނުންކުރާ މައި މަގެއް ކަމަށްވާ ހުރްމުޒް ކަނޑުއޮޅި ބަންދުކޮށްފަ އެވެ. އެއާއެކު ދުނިޔޭގެ ބާޒާޒުގައި ތެލުގެ އަގު ވަރަށް ބޮޑަށް އުފުލި، އެއާލައިންތަކުން ވަނީ ޓިކެޓުގެ އަގު ބޮޑުކުރަން ފަށާފަ އެވެ.
މިކަމާ ބެހޭގޮތުން ފިރާގު "ސީއެންއެމް" އަށް ވިދާޅުވީ، ކުރިއަށް އޮތް ދުވަސްތަކުގައި ޓިކެޓުގެ އަގުތައް އިތުރަށް ބޮޑުވުމުގެ ފުރުސަތު އެބައޮތް ކަމަށާއި، އެގޮތުން ގާތްގަނޑަކަށް 30 އިންސައްތައާ ހަމައަށް ޓިކެޓުގެ އަގު ބޮޑުވާނެ ކަމަށް ލަފާކުރެވޭ ކަމަށެެވެ. އަދި މިކަމުގެ ސަބަބުން ދަތުރުކުރާ މީހުންގެ އަދަދު މަދުވެ، ވައިގެ ދަތުރުފަތުރުގެ ދާއިރާއަށް ވަރަށް ބޮޑު ހީނަރުކަމެއް އަންނާނެ ކަމުގައި އޭނާ ފާހަގަކުރެއްވި އެވެ.
ފިރާގު ވިދާޅުވީ، ވައިގެ އުދުހުންތަކުގެ އަގު އުފުލުމާ ގުޅިގެން ރާއްޖޭގެ ފަތުރުވެރިކަމުގެ ސިނާއަތަށް މިހާރުވެސް އޭގެ ނޭދެވޭ އަސަރު ކުރަން ފަށާފައިވާ ކަމަށެވެ. އެގޮތުން ބުކިންތައް ކެންސަލްކުރާ މިންވަރު އިތުރުވެ، ފަތުރުވެރިން އަންނަ އަދަދު ވަރަށް ބޮޑަށް ދަށްވެފައިވާ ކަމަށް އޭނާ ވިދާޅުވި އެވެ. އަދި މި ހާލަތު ދިގުލައިގޮސްފި ނަމަ ފަތުރުވެރިކަން ދަށަށްގޮސް ރާއްޖޭގެ އިގްތިސޯދަށް ބޮޑެތި ގެއްލުންތަކެއް ލިބުމުގެ ފުރުސަތު އެބައޮތް ކަމަށް އޭނާ ވަނީ ވިދާޅުވެފަ އެވެ.
ފިރާގު އިތުރަށް ވިދާޅުވީ މިވަގުތު ކަންކަން ހިނގަމުންދާ ގޮތަށް ބަލާއިރު، މެދުއިރުމަތީގެ މަޝްރަހު އަމާންވެ ތެލުގެ އަގަށް ހެޔޮ ބަދަލެއް އަންނާނެ ދުވަހެއް ލަފާކުރަން ނޭނގޭ ކަމަށެވެ. އަދި ތެޔޮ އަގުހެޔޮވި ނަމަވެސް، ކަންކަން އާންމު ހާލަތަށް ރުޖޫއަވުމަށް ދެ މަހެއްހާ ދުވަސް ނަގާނެ ކަމަށް އޭނާ ވަނީ ވިދާޅުވެފަ އެވެ. އެހެންކަމުން ކުރިއަށް އޮތް ދުވަސްތަކުގައި ދިމާވެދާނެ އުނދަގޫ ހާލަތަކަށް ވިސްނައި ތައްޔާރީ ފިޔަވަޅުތައް އަޅަންޖެހޭ ކަމަށް ފިރާގު ވިދާޅުވި އެވެ. އެގޮތުން، އެތެރޭގެ ދަތުރުފަތުރުގެ ހަރަދުތަކާއި އެހެނިހެން ހަރަދުތައް ވެސް ކުޑަކުރުން މުހިންމުކަމުގައި އޭނާ ފާހަގަކުރެއްވި އެވެ.
އިރާނު ހަނގުރާމައާ ގުޅިގެން، މީގެ ކުރިން 85 ޑޮލަރާއި 90 ޑޮލަރާ ދެމެދުގެ އަގުތަކުގައި ލިބެންހުރި ތެލާއި ޖެޓް ފިއުލް ފީފާއެއްގެ އަގު މިހާރު ވަނީ 150 ޑޮލަރާއި 200 ޑޮލަރަށް އުފުލިފަ އެވެ. ހަނގުރާމައާ ގުޅިގެން ގިނަ އަދަދެއްގެ ޓުއާ އޮޕަރޭޓަރުން މެދުއިރުމައްޗަށް ކުރާ ދަތުރުތައް ވަގުތީ ގޮތުން މެދުކަނޑާލާފައިވާކަން ވެސް ފާހަގަކޮށްލެވެ އެވެ.
ތެލުގެ ހަރަދު ބޮޑުވުމުގެ އިތުރުން ވައިގެ ސަރަހައްދުތައް ބަންދުކޮށްފައި އޮތުމުން ދުނިޔޭގެ ދަތުރުފަތުރުގެ ސިނާއަތް ވެސް ދަށަށްދާނެ ކަމަށް މަޝްރަހު ދިރާސާކުރާ ފަރާތްތަކުން ބުނެ އެވެ.
އެގޮތުން ރާއްޖެއަށް ބަލާއިރު، މި މަހުގެ މިހާތަނަށް ރާއްޖެއަށް ޒިޔާރަތް ކުރި ފަތުރުވެރިންގެ އަދަދު، މިދިޔަ އަހަރުގެ މި މުއްދަތާ ބަލާއިރު ދަށްވެފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ވެސް ވަނީ ދައްކައިފަ އެވެ. ފަތުރުވެރިން ރާއްޖެ އައުން ދަށްވީ މެދުއިރުމަތީގައި މިހާރު ހިނގަމުން އަންނަ ހަނގުރާމައާ ގުޅިގެންނެވެ.
