ސަތާރަ އަހަރު ވަންދެން ރާއްޖޭގެ ގައުމީ ޓީމުގެ ގޯލް ބެލެހެއްޓި އަދި މިހާރު ގައުމީ ޓީމުގެ ގޯލް ކީޕަރު ކޯޗުގެ މަގާމުގައި ހުރި އިމްރާން ބުނީ، ލޮކްޑައުންގެ ސަބަބުން ޕްރެކްޓިސް ނުކޮށް ތިބި ގައުމީ ޓީމްގެ ކުޅުންތެރިންނަށް ކޮންމެވެސް ހައްލެއް ހޯދައިދިނުމަށް އެދޭ ކަމަށެވެ.
ރާއްޖެއަށް ސާފް ޗެމްޕިއަންޝިޕްގެ ރަން މެޑަލް އެންމެ ފުރަތަމަ ހޯދައިދިން ގައުމީ ޓީމުގައިވެސް ހިމެނޭ، އަދި ކުޅިވަރުގެ އާއިލާގެ ގިނަބައެއްގެ ލޯއްބާއި އިހްތިރާމް ލިބިފައިވާ އިމްރާން ބުނީ، އޭނާ މި ވާހަކަ ދައްކަނީ ހަމައެކަނި ފުޓްބޯޅަ ކުޅުންތެރިންގެ ވާހަކައެއް ނޫން ކަމަށާއި އެހެން ކުޅިވަރުތައް ހިމެނޭ ގޮތަށް ކަމަށެވެ.
އިމްރާންގެ ވާހަކަ މި ގޮތަށް މިއައީ، ޕްރެކްޓިސް ނުކުރާ ދުވަސްވަރު މުސާރަ ނުލިބޭނެ ކަމަށް ވިދާޅުވެ، ކުޅިވަރާއި ބެހޭ ވަޒީރު އަހްމަދު މަހްލޫފު ދެއްކެވި ވާހަކަފުޅާއި ގުޅިގެންނެވެ. މިދިޔަ ހަފްތާގެ ތެރޭގައި މިނިސްޓަރު މަހްލޫފު ވިދާޅުވެފައި ވަނީ ގައުމީ ޓީމަށް އެލަވެންސް ނުލިބިގެން އުޅެނީ ފަރިތަކުރުންތައް ކުރިއަށް ނުގެންދާތީ ކަމަށެވެ. އެކަމާއި ގުޅިގެން ގިނަ އެތްލީޓުން އަންނަނީ ހިޔާލުފާޅުކުރަމުންނެވެ.
