އެ މިނިސްޓްރީން ބުނީ އެފަދަ އިލެކްޓްރިކް ޑްރޯންތަކަކީ ރަށްތަކަށް އަސާސީ ހިދުމަތްތައް ފޯރުކޮށްދޭން ބޭނުންކުރެވިދާނެ އުޅަނދުތަކެއް ކަމަށެވެ. އެފަދަ އުޅަނދު ބޭނުންކޮށްގެން ދެވިދާނެ ފަސް ހިދުމަތެއް އެ މިނިސްޓްރީން ފާހަގަކޮށްފައިވެ އެވެ.
އެ ގޮތުން މެޑިކަލް ސާމްޕަލް އެއް ރަށުން ރަށްރަށުގެ ހެލްތު ފެސިލިޓީތަކުން އެހެން ރަށްރަށުގައި ހުންނަ ލެބޯޓްރީތަކަށް ގެންދިއުންމާއި، އަވަހަށް ގެންދަން ޖެހޭ ބޭހާއި ވެކްސިނާއި ބޭސްފަރުވާއަށް ބޭނުންވާ މުހިއްމު އެހެން ތަކެތި އުފުލުމާއި، ކުއްލި ހާލަތްތަކާއި ކާރިސާތަކުގެ ވަގުތުގައި ފަސްޓް އެއިޑް ކިޓްތަކާއި އެ ނޫން ވެސް ސާމާނު އުފުލުމާއި، އެއާކްރާފްޓްގެ ޑިޒައިނަަށް އެކަށީގެންވާ ބަދަލުތައް ގެނެސް، ސިއްހީ ކަންކަމުގައި މީހުން އުފުލުމުގެ އިތުރުން ތިމާވެށްޓާއި އިންފްރާސްޓްރަކްޗާ މޮނިޓާކުރުން ހިމެނެ އެވެ.
ޓްރާންސްޕޯޓް މިނިސްޓްރީން ބުނިގޮތުގައި އެ ޓެކްނޮލޮޖީއަކީ ދަތުރުފަތުރުގައި މިހާރު ބޭނުންކުރާ ފެރީތަކާއި ޑޮމެސްޓިކް ފްލައިޓްތަކުގެ ބަދަލުގައި ބޭނުންކުރެވޭނެ އެއްޗަކަށް ނުވިޔަސް އެއީ އެ ހިދުމަތްތަކަށް ފަސޭހަކޮށްދޭނެ އެއްޗެއް ކަމަށެވެ.
އީވީޓޯލް "މޭނެޑް ޑްރޯން" އުދައްސުމުގެ ހަރަކާތްގެ ތެރެއިން
އެ ބާވަތުގެ އުޅަނދުތައް ރާއްޖެއަށް ތައާރަފްކޮށް، ތަކެތި އުފުލުމުގައި ބޭނުންކުރުމަކީ އިގުތިސާދީގޮތުން ފުރުސަތުތަކެއް ހުޅުވޭނެ ކަމަށް ވެސް އެ މިނިސްޓްރީން ބުންޏެވެ.
އެއީ އާ ސިނާއަތްތައް ދިރި، ހުނަރު ހުރި މީހުންނަށް ވަޒީފާގެ ފުރުސަތުތައް އުފެދޭނެ ކަމެއް ކަމަށް ވެސް އެ މިނިސްޓްރީން ވަނީ ފާހަގަ ކޮށްފައި އެވެ.
އެ އުޅަނދުތަކަށް ބޭނުންވާ ބެޓެރީ ވިއްކުމާއި ޗާޖްކުރުމުގެ ހިދުމަތަކީ ވެސް އުފެދޭނެ ފުރުސަތެކެވެ.
މެޑިކަލް އިމަޖެންސީތަކަށް ބޭނުންވާ ސާމާނު ސަޕްލައި ކުރުމާއި އެއާ ސްޕޭސް މެނޭޖްމަންޓް އަދި އޭވިއޭޝަނަށް ބޭނުންވާ ސޮފްޓްވެއާ އުފެއްދުމަކީ ވެސް އޮންނާނެ ފުރުސަތެއްގެ ގޮތުގައި މިނިސްޓްރީން ފާހަގަކުރި އެވެ.
