ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން ޝިމާދު ވިދާޅުވީ، 2024 ވަނަ އަހަރު ބަންކަރިން ވިޔަފާރި ފަށައި، އާ އުފެއްދުމެއް ކަމަށްވާ ވީއެލްއެސްއެފް ވިއްކަން ފެށުމަކީ އެސްޓީއޯއަށް ލިބުނު ބޮޑު ކާމިޔާބީއެއް ކަމަށެވެ. އެގޮތުން އެ މަސައްކަތް ފެށިތާ ފުރަތަމަ ދެތިން މަހު ގާތްގަނޑަކަށް 2.9 މިލިއަން ޑޮލަރުގެ އާމްދަނީއެއް ލިބުނުއިރު، ޖެހިގެން އައި 2025 ވަނަ އަހަރު އެ އަދަދު ވަނީ 18 މިލިއަން ޑޮލަރަށް އަރައިފަ އެވެ. އަދި މިއަހަރުގެ އޮކްޓޫބަރު މަހާ ހަމައަށް އެ ވިޔަފާރިން 70 މިލިއަން ޑޮލަރަށް ވުރެ އިތުރަށް އާމްދަނީ ލިބިފައިވާ ކަމަށް އޭނާ ހާމަކުރެއްވި އެވެ.
ޝިމާދު ފާހަގަކުރެއްވި ގޮތުގައި އެސްޓީއޯއިން މި ވިޔަފާރި ތައާރަފް ނުކުރިނަމަ އެ ހުރިހާ ފައިސާއަކީ ގައުމުން ބޭރަށް ދާނެ ފައިސާ އެވެ. އަދި ރާއްޖޭގެ ސަރަހައްދުގައި އެ ބާވަތުގެ ތެޔޮ އެޅުމާއި ބަންކަރިންގެ އެހެނިހެން ހިދުމަތްތަކުގެ ފައިދާ ވެސް ނަގާނީ ބޭރުގެ ފަރާތްތަކުން ކަމަށް އޭނާ ވިދާޅުވި އެވެ.
މީގެއިތުރުން، މިހާރު މި މަސައްކަތް ކުރިއަށްދަނީ "ޑެމޮންސްޓްރޭޝަނެއް"ގެ ފެންވަރުގައި ބޯޓުތައް ބޭނުންކޮށްގެން ކަމަށާއި، މި ވިޔަފާރި އެންމެ ފުރިހަމަ ގޮތުގައި ކުރިއަށް ގެންދިއުމަށްޓަކައި އެއްގަމުގައި ތެޔޮ ރައްކާކުރާނެ ވަސީލަތްތައް ބޭނުންވާ ކަމަށް ޝިމާދު ވިދާޅުވި އެވެ.
ޝިމާދު ވިދާޅުވީ އިހަވަންދިއްޕޮޅު ފަދަ ސަރަހައްދުތަކުގައި ތެޔޮ ރައްކާކުރާނެ ޖާގަ ގާއިމްކުރުމަކީ މުހިންމު ކަމެއް ކަމަށާއި، މިހާތަނަށް ލިބިފައިވާ އާމްދަނީގެ އަދަދުތަކުން މިއީ އިތުރަށް ކުރިއަށް ގެންދަން ހިތްވަރު ލިބޭ ފަދަ ފައިދާހުރި ވިޔަފާރިއެއްކަން ސާބިތުވާ ކަމަށެވެ.