މި އަހަރުގެ ޖުލައި މަހު ބޭއްވުމަށް ތާވަލުކޮށްފައިވާ އޮލިމްޕިކްސް ވަނީ އަންނަ އަހަރުގެ ޖުލައި އަށް ފަސްކޮށްފަ އެވެ. އޮލިމްޕިކްސް ފަސްކުރީ ދުނިޔޭގައި ހަލުއި ކަމާއި އެކު ފެތުރެމުންދާ ކޮރޯނާ ވައިރަހާއި ގުޅިގެން ގޭމްސް ބޭއްވޭނެ ގޮތެއް ނެތުމުންނެވެ. އިންޓަރނޭޝަނަލް އޮލިމްޕިކް ކޮމިޓީގެ ރައީސް ބާކް ވިދާޅުވީ، މިހާރު ފަސްކޮށްފައިވާ ތާވަލާއި އެއްގޮތަށް ނުބޭއްވިއްޖެ ނަމަ ދެން ޖެހޭނީ ޓޯކިޔޯ އޮލިމްޕިކްސް ކެންސަލް ކުރަން ކަމަށެވެ.
އަންނަ އަހަރުގެ ޖުލައި މަހަށް އޮލިމްޕިކްސް ފަސްކޮށްފައިވާއިރު، ސިއްޙީ ތަޖުރިބާކާރުން ބުނަމުން އަންނަނީ އެ މުއްދަތުގައިވެސް އޮލިމްޕިކްސް ބޭއްވުމަކީ ނާދިރުކަމެއް ކަމަށެވެ. ސިއްހީ ތަރުރިބާކާރުންގެ ވާހަކައަކީ އޮލިމްޕިކްސް ބޭއްވޭނީ ކޮރޯނާއަށް ވެކްސިނެއް ހޯދިގެން ކަމަށެވެ. އެހެންނަމަވެސް ޓޯކިޔޯ ގޭމްސްގެ ޗީފްވެސްވަނީ ދެން އިތުރަށް ފަސް ނުކުރެވޭނެ ކަމަށާއި މިހާރު ކަނޑައަޅާފައިވާ ތާރީޚުގައި ނުބޭއްވޭނަމަ ދެން ޖެހޭނީ ކެންސަލް ކުރަން ކަމަށް ވިދާޅުވެފައެވެ.
ހަތަރު އަހަރުން ހަތަރު އަހަރުން ބާއްވާ އޮލިމްޕިކްސްއަކީ ދުނިޔޭގެ އެންމެ ބޮޑު ކުޅިވަރު އީދެވެ. ޓޯކިޔޯ އޮލިމްޕިކްސްގައި ތެއްތިރީސް ކުޅިވަރަކުން ތިން ސަތޭކައަށްވުރެ ގިނަ އިވެންޓް އޮންނާނެ އެވެ.