މާލެ ސަރަހައްދު ލޮކްޑައުންއަކަށް ދިއުމާއެކު އާންމު ހާލަތެކޭ އެއްގޮތަށް ގެތަކަށް ގޭސް ފޯރުކޮށްދިނުމުގެ މަސައްކަތް ފެށި އެވެ. ގޭހަށް ނުޖެހި ގޭގޭގައި ކެއްކޭނެ އިންތިޒާމު ހަމަޖެއްސުމަށް މޯލްޑިވް ގޭހުގެ މުވައްޒަފުން މި ބިރުވެރި ހާލަތުގައި ވެސް މަސައްކަތަށް ނިކުތްއިރު މިހާތަނަށް އެ މަސައްކަތުގައި އުޅެނިކޮށް އެތަނުގެ 14 މުވައްޒަފަކަށް ވަނީ ކޮވިޑް-19 ޖެހިފަ އެވެ. އެއާއެކު ބައެއް މުވައްޒަފުން އައިސޮލޭޝަނުގައި ތިބި ނަމަވެސް، މަސައްކަތް ހުއްޓައެއް ނުލަ އެވެ. އާ ހިތްވަރަކާއެކު އެ ކުޑަކުޑަ ޓީމު މަސައްކަތް ކުރަމުން އަންނަނީ ރައްޔިތުންގެ ހައްގުގަ އެވެ. 

މޯލްޑިވް ގޭސްގެ މާކެޓް އެންޑް ބިޒްނަސް ޑިވެލޮޕްމަންޓް މެނޭޖަރު އައިމިނަތު މުހައްމަދު ސައީދު "ސީއެންއެމް" އަށް ވިދާޅުވި ގޮތުގައި ކުޑަ ޓީމެއް މިވަގުތު އޮތް ނަމަވެސް ކޮންމެ ދުވަހަކު ވެސް ޓީމު މަސައްކަތް ނިންމާލަނީ އެ ދުވަހެއްގައި ލިބޭ ހުރިހާ އޯޑަރެއް ޑެލިވާކުރުމަށް ފަހެވެ.

އައިމިނަތު ވިދާޅުވީ، މޯލްޑިވް ގޭހުގެ ޑެލިވަރީ ޓީމު މަސައްކަތް ކުރަމުން އަންނަނީ ރައްކާތެރިކަމުގެ ފިޔަވަޅުތަކާއި ވެސް އެކުގަ ކަމަށެވެ. އެގޮތުން ގޭސް ސިލިންޑަރުތައް މާލެއަށް ގެންނައިރާއި ތިލަފުއްޓަށް ގޭސް އެޅުމަށް ގެންދާއިރުގެ އިތުރުން ގޭސް އެޅުމަށް ފަހު ޕްލާންޓުން ނެރުމަށް ފަހު ހުރިހާ ފުޅިއެއް ވަކިވަކިން ޑިސްއިންފެކްޓް ކުރެ އެވެ. 

އޭގެ އިތުރުން މާލެ ގެނެސް ކޮންމެ އައުޓްލެޓަކަށް ގޭސް ފުޅި ވައްދާއިރާއި ގެތަކުން ނަގައި ހުސް ފުޅިވެސް އައުޓްލެޓަށް ވެއްދުމުގެ ކުރިން ޑިސްއިންފެކްޓް ކުރެ އެވެ. އަދި ގޭގެއަށް ގެންދާ ހުރިހާ ފުޅިތަކަކީ ވެސް ޑިސްއިންފެކްޓްކޮށްފައިވާ ފުޅިކަން އައިމިނަތު ފާހަގަކުރައްވަ އެވެ. 

ގޭސްފުޅިތައް ޑިސްއިންފެކްޓްކުރަނީ-- ފޮޓޯ: މޯލްޑިވް ގޭސް

އައިމިނަތު އިތުރަށް ވިދާޅުވީ، ގޭސް ޑެލިވަރީ ކުރުމުގައި އުޅޭ މުވައްޒަފުން ވެސް އުޅޭނީ އަންގިޔާއި މާސްކް އަޅައިގެން ކަމަށެވެ. އަދި މިވަގުތު ހިދުމަތްދެމުން އަންނަނީ އައިސޮލޭޝަނަށް ނުގެންދާ، މާލެ، ވިލިމާލެ އަދި ހުޅުމާލޭގެ ހުރިހާ މުވައްޒަފުން ގުޅިގެންކަން އޭނާ ފާހަގަކުރައްވަ އެވެ. 

ގޭސް ޑެލިވަރީ ކުރުމުގައި އުޅޭ މުވައްޒަފުންގެ އިތުރުން ތިލަފުށީ ޕްރޮޑަކްޝަން ފްލާންޓުގެ މުވައްޒަފުނަކީ ވެސް ފްރޮންޓްލައިނުގައި މަސައްކަތް ކުރާ މުވައްޒަފުންނެވެ. އެގޮތުން، އައިމިނަތު ވިދާޅުވި ގޮތުގައި ހުރިހާ މެޑިކަލް އޮކްސިޖަނެެއް އުފައްދަނީ އެތަނުންނެވެ. އަދި އަތޮޅުތަކަށް ޑެލިވަރީކުރާ ބޯޓު ފަހަރާއި ރިސޯޓުތަކަށް ގޭސް ގެންދާ ބޯޓު ފަހަރަށް ބަރުކުރަނީ ސީދާ ތިލަފުށިންނެވެ. 

ރައްޔިތުންނަށް ބޭނުންވާ ޒަރޫރީ ހިދުމަތެއް މެދުނުކެނޑި، ފޯރުކޮށްދިނުމުގެ މަގުސަދުގައި ހާއްސަ އިންތިޒާމުތަކަކާއެކު މޯލްޑިވް ގޭހުން މަސައްކަތް ކުރަމުން އަންނައިރު މުވައްޒަފުންގެ ފަރާތުން ފެނިގެންދާ ކެތްތެރިކަމާއި ހިތްވަރަށް އެތަނުގެ ވެރިން ސާބަސްދެ އެވެ. އެތަނުން މަސައްކަތް ކުރަމުން އަންނަނީ މި ދަތި އުނދަގޫ ވަގުތުގައި ވެސް ކަސްޓަމަރުންނަށް ވީހާވެސް ލުއިތަކާއެކު ހިތްހަމަޖެހޭނެ ފަދަ ގޮތަށް ހިދުމަތް ދިނުމަށެވެ.