އިދިކޮޅު ކޯލިޝަނުން މިއަދު ނެރުނު ބަޔާނުގައި ވަނީ ފުލިދޫ ދާއިރާގެ މަޖިލިސް މެމްބަރު އިބްރާހިމް ފަޒުލް މަޖިލީހަށް ހުށަހެޅި އެރަށަށް ދިމާވެފައިވާ ރައްގިރުމުގެ މައްސަލައިގެ ގަރާރު ރައްޔިތުންގެ މަޖިލީހަށް ހުށަހަޅާފައިވަނީ މިދިޔަ ފެބުރުއަރީ މަހުގެ ތެރޭގައިކަމަށެވެ. އެގޮތުން އެ ގަރާރު ކުއްލި ގޮތަކަށް އެޖެންޑާ ކުރިކަމަށްވެސް ބަޔާނުގައިވެ އެވެ.
ނަމަވެސް މަޖިލީހުގެ ގަވައިދާ ހިލާފަށް އެ ގަރާރު ރައީސް މުހައްމަދު ނަޝީދު ބޭރުކޮށްލެއްވުމުން ހާމަވެގެންދަނީ ރައްޔިތުންނަށް އެއްވެސް ވަރަކަށް ބެލުމެއް ނެތްކަމާއި އެމަނިކުފާނު ގެންގުޅުއްވާ ހުދުމުހުތާރު ގޮތްކަމަށް ބަޔާނުގައި ބުނެފައިވެއެވެ. އެހެންކަމުން އެކަން ހަރުކަށި އިބާރާތުން ކުށްވެރިކުރާކަމަށެވެ.
ފުލިދޫ ރައްގިރުމުގެ މައްސަލަ ބޭރުކޮށްލުމަށް ސަބަބެއްކަމަށް މަޖިލީހުގެ ރައީސް ވިދާޅުވެފައިވަނީ ގަރާރު ހުށަހެޅުއްވި މެމްބަރު މަޖިލީހުގައި ހާޒިރުނުވުމުން ކަމަށްވާއިރު، އިދިކޮޅުގެ ބަޔާނުގައި ބުނެފައިވަނީ ހުށަހަޅާފައިވާ ގަރާރެއް އެޖެންޑާކުރުމަށް ފަހު މަޖިލީހުގެ ތަޅުމުގައި އެ ހުށަހެޅުއްވި މެމްބަރު އިނުން ގަވައިދުގައި ލާޒިމް ނުކުރާކަމަށެވެ. އެގޮތުން އެ ސަބަބު އިދިކޮޅު ގަބޫލު ނުކުރާކަމަށެވެ.
އޭގެ އިތުރުން ނަޝީދުއަށް ފާޑުވިދާޅުވެ އިދިކޮޅު ބަޔާނުގައި ބުނީ މަޖިލީހުގައި މައިނޯރިޓީގެ އަޑު ކަނޑުވާލުމަށް ހުދުމުހުތާރުކަމާއެކު އެމަނިކުފާނު މަސައްކަތް ކުރައްވާކަމަށެވެ. އަދި ނަޝީދު ކުރައްވާ ގަވައިދާ ހިލާފު ކަންކަމުގައި އަމީންއާންމާއި، ކައުންސެލް ޖެނެރަލްއާ ސާޖަންޓް އާމްސް ބައިވެރިވެ، އެއްބާރުންލުން ދޭތަން ފެނުމަކީ އިދިކޮޅު ކޯލިޝަނުން ނުހަނު ކަން ބޮޑުވާކަމެއް ކަމަށްވެސް ބުނެފަވެ އެވެ.