މިދިޔަ އަންގާރަ ދުވަހު ބާރަށުގެ ދެމަފިރިން، ދިއްދޫ ހޮސްޕިޓަލަށް ދިއުމުން އެތަނުގައި ރޭޑިއޮލޮޖީ ސްކޭން ހެދެން ނެތުމުން ވަނީ ކުޅުދުއްފުށީ ހޮސްޕިޓަލަށް ދިއުމަށް އަންގާފަ އެވެ. އެ ދަތުރުކުރުމަށް އާސަންދަ ހަމަޖެހިފައި ނުވާތީ އެނބުރި ރަށަށް އައުމަށް ފަހު އިއްޔެ ލޯންޗެއް ހިފައިގެން އެމީހުން ކުޅުދުއްފުއްޓަށް ދިޔައިރު އެތަނުން ވަނީ ކުއްޖާ ބަނޑަށް މަރުވެފައިވާކަން އަންގާފަ އެވެ. 

އެކަމާއި ގުޅިގެން އާއިލާއިން ބައެއް ނޫސްތަކަށް މައުލޫމާތު ދިން ގޮތުގައި އެ ހޮސްޕިޓަލުގައި އެޑްމިޓްވެގެން ތިބެވޭނެ ވަރުގެ ތަނަވަސްކަން އާއިލާގެ ކިބައިގައި ނެތުމުން، ހޮސްޕިޓަލުން ވަނީ ރަށަށް ދިއުމަށް އަންގާފަ އެވެ. 

އެ ތުހުމަތުތަކާއި ގުޅިގެން ކުޅުދުއްފުށީ ހޮސްޕިޓަލުގެ މެނޭޖަރު ދާއޫދު މިއަދު ސީއެންއެމްއަށް ވިދާޅުވީ ރޭޑިއޮލޮޖީ ސްކޭން ހެދުމަށް ފަހު ބެލިއިރު އެއީ 15 ހަފުތާގެ ކުއްޖެއް ކަމަށާއި އަދި އެކުއްޖާގެ ފުރާނަވެސް ނެތް ކަމަށެވެ. 

އެވަގުތު އެ އާއިލާއަށް އާސަންދަ ހަމަނުޖެހުނީ ކީއްވެތޯ ސުވާލުކުރުމުން ދާއޫދު ވިދާޅުވީ ރަނގަޅުކުރަން ޖެހޭ ކަންކަން އެބަ ހުރި ކަމަށް ގަބޫލުކުރައްވާ ކަމަށެވެ. އެކަމަކު އެކަންކަމެއް ހިއްސާއެއް ނުކުރައްވަ އެވެ. 

ދާއޫދު އިތުރަށް ވިދާޅުވީ އެފަދަ ހާލަތްތަކުގައި ޕޭޝަންޓް ދާން ބޭނުންވާނަމަ، އެ ފުރުސަތު ހޮސްޕިޓަލުން ދޭނެ ކަމަށެވެ. 

ދިއްދޫގައި ހުންނަ ހއ. އަތޮޅު ހޮސްޕިޓަލުގައި މިހާރު އެމީހާއަށް ފަރުވާދެމުން އަންނައިރު އެހޮސްޕިޓަލުގެ މެނޭޖަރު އުސްމާން އަޝްރަފު ވިދާޅުވި ގޮތުގައި އަންހެން މީހާގެ ހާލު މިހާރު ރަނގަޅެވެ. 

މިފަހަކަށް އައިސް މާބަނޑު މީހުންގެ ބަނޑަށް ދަރިފުޅުމުގެ ހާދިސާތައް ހިނގުން އިތުރެވެ. އެގޮތުން މިދިޔަ މަހެއްހާ ދުވަހުގެ ތެރޭގައި މިއީ މީޑިއާއަށް ތިލަވި ތިން ވަނަ ހާދިސާ އެވެ.