ލަންކާގެ ކުޅިވަރު ވަޒީރުކަމުގެ މަގާމުގައި 2010 ވަނަ އަހަރުން ފެށިގެން 2015 ވަނަ މަގާމުގައި ހުންނެވި، އަދި މިހާރު ލަންކާގެ މިނިސްޓަރ އޮފް ސްޓޭޓް ފޯ ރިނިއުބަލް އެނަރޖީ އެންޑް ޕަވަރގެ މަގާމުގައި ހުންނެވި، މަހިންދަނަންދަ ތުހުމަތު ކުރެއްވި ގޮތުގައި، 2011 ވަނަ އަހަރުގެ ކްރިކެޓް ވޯލްޑްކަޕުގެ ފައިނަލް މެޗުގެ ކުރިން މެޗުވަނީ ފިކްސްކޮށްފައެވެ. އެހެންނަމަވެސް މިކަމުގެ ތަފްސީލުތައް ދެއްވަން އޭނާވަނީ ދެކޮޅު ހައްދަވާފައެވެ. އޭނާ ދެކެވަޑައިގަންނަވާ ގޮތުގައި މެޗު ފިކްސް ނުކުރި ނަމަ މުބާރާތް ލަންކާއިން ކާމިޔާބުކުރީހެވެ.
2011 ވަނަ އަހަރުގެ އޭޕްރީލް މަހު މުމްބާއީގައި ކުޅެވުނު އިންޑިއާ- ލަންކާގެ ފައިނަލް މެޗު އިންޑިއާއިން ކާމިޔާބުކުރީ ހަ ވިކެޓުންނެވެ. ލަންކާގެ ކުރީގެ ކުޅިވަރު ވަޒީރުގެ މި ބޮޑު ތުހުމަތާއި އެކު އިންޑިއާ ކުޅުންތެރިންވަނީ މެޗު ފިކްސް ކުރުމުގެ އެއްވެސް ކަމެއް އެ ކުޅުންތެރިން ނުކުރާ ކަމަށް ބުނެފައެވެ.
އަނެއްކޮޅުން، އޭރު ލަންކާގެ ކެޕްޓަނަކަށް ހުރި، ކުމާރު ސަންގަކާރަވަނީ މިނިސްޓަރުގެ މި ތުހުމަތުތަކާއި އެކު ހައިރާންކަމެއް ލިބިފައިވާ ކަމަށް ބުނެފައެވެ. އޭނާ ބުނެފައިވަނީ ލަންކާ ކުޅުންތެރިން އެ ފަދަ ކަމެއް ކޮށްފައި ނުވާނެ ކަމަށެވެ.
ލަންކާގެ ކުރީގެ ކުޅިވަރު ވަޒީރަކީ، އިންޑިއާ އާއި ލަންކާގެ ފައިނަލް މެޗު ފިކްސް ކުރިކަމުގެ ތުހުމަތު ކުރި ދެވަނަ ފަރާތެވެ. މީގެ ކުރިން ލަންކާއާއި އެކު ވޯލްޑްކަޕް ކާމިޔާބުކުރި ލަންކާގެ ކުރީގެ ކެޕްޓަން، އަރުޖުނާ ރަތުނުންގާވެސްވަނީ 2011 ވަނަ އަހަރުގެ ކްރިކެޓް ވޯލްޑްކަޕުގެ ފައިނަލް މެޗު ފިކްސްކޮށްފައިވާ ކަމަށް ތުހުމަތުކޮށްފައެވެ.