އެމްއެމްޕީއާރްސީގެ ހިޔާނާތުގެ ފައިސާ ކަމަށް ތުހުމަތުކުރާ އެއް މިލިއަން ޑޮލަރު ރައީސް ޔާމީންގެ އިސްލާމިކް ބޭންކްގައި އޮންނަ ސޭވިން އެކައުންޓަކަށް ޖަމާކޮށް މަނީ ލޯންޑާކުރި ކަން ސާބިތުވުމުން ރައީސް ޔާމީން ފަސް އަހަރަށް ޖަލަށްލުމަށް ހުކުމްކުރީ މިދިޔަ ނޮވެމްބަރު މަހުގެ 28 ވަނަ ދުވަހު އެވެ. އަދި ޖޫރިމަނާ ފައިސާ ކަމުގައިވާ ފަސް މިލިއަން ޑޮލަރު ނުވަތަ 77.1 މިލިއަން ރުފިޔާ، ހުކުމް ކުރި ދުވަހުން ފެށިގެން ހަމަސް ދުވަސް ތެރޭގައި ކޯޓަށް ދެއްކުމަށްވެސް ވަނީ އަމުރުކޮށްފަ އެވެ.
އެހެން ނަމަވެސް އެ ފައިސާ ދައްކާފައިނުވާތީ އެ މައްސަލައިގައި ރައީސް ޔާމީނާއި ދެކޮޅަށް ސިވިލް ކޯޓުގައި ދައުވާ ކުރުމަށް ނިންމާފައިވާކަމަށް ބަންޑާރަނައިބުގެ އޮފީހުން ސީއެންއެމްއަށް މައުލޫމާތުދެ އެވެ.
ބަންޑާރަނައިބުގެ އޮފީހުން ބުނެފައިވަނީ އެ މައްސަލައިގައި ދައުވާ ކުރުމަށް ނިންމާފައިވާ ކަމަށާއި، އަދި ލިޔެކިޔުންތައް ތައްޔާރުވިހާ އަވަހަށް އެ މައްސަލައިގައި ދައުވާ ކުރާނެ ކަމަށެވެ.
ރައީސް ޔާމީނަށް ކްރިމިނަލް ކޯޓުން އިއްވި ހުކުމް އެމަނިކުފާނުގެ ފަރާތުން ހައިކޯޓުގައި އިސްތިއުނާފު ކޮށްފައިވާއިރު އެ މައްސަލައިގެ އަޑުއެހުމެއް އިއްޔެވެސް ބާއްވާފައިވެ އެވެ.