ޖެންޑާ މިނިސްޓްރީން އަންހެނުންނާ ކުޑަކުދިންނަށްކުރާ ޖިންސީ ގޯނާއާ ދެކޮޅަށް ކުރިއަށް ގެންދަން ނިންމާފައިވާ އެ ކެމްޕޭންނާއި ގުޅޭގޮތުން ކަމާ ގުޅޭ ފަރާތަކާއެކު މިއަދު ވަނީ ސްޓެލްކޯ ސެމިނާ ރޫމްގައި މަޝްވަރާ ބައްދަލުވުމެއް ބާއްވާފަ އެވެ.
އެ ބައްދަލުވުމާ ގުޅޭ ގޮތުން ސީއެންއެމްއަށް މައުލޫމާތު ދެއްވަމުން ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވީ މިއަދު ބެއްވި އެ މަޝްވަރާ ބައްދަލުވުމަކީ އެމިނިސްޓްރީން ދެ އަހަރު ދުވަހުގެ މުއްދަތަށް ކުރިއަށް ގެންދަން ނިންމާފައިވާ ކެމްޕޭނެއް ކަމަށާއި އެގޮތުން އެ ބައްދަލުވުމަކީ ކެމްޕޭން ފެށުމުގެ ކުރިން ކަމާ ގުޅޭ ފަރާތްތަކުގެ އަޑު އެހުމަށް ބޭއްވުނު ބައްދަލުވުމެއް ކަމަށެވެ.
އެ ބައްދަލުވުމުގައި ހަތަރު ކަމަކާ ގުޅިގެން މަޝްވަރާކުރެވުނު ކަމަށާއި އެއީ އިޖުތިމާއީ ކަންބޮޑުވުންތަކާއި، އެ ދާއިރާތަކުގައި ހިދުމަތް ލިބުމުގައި ހުރި ގޮންޖެހުންތައް ކަމަށް މިނިސްޓަރު ވިދާޅުވި އެވެ. އަދި އެފަދަ މައްސަލަތަކުގައި ސައިލަންސް ބްރޭކްވުމުން ރިޕޯޓްކުރެވެމުންދާ މިންވަރު އިތުރުވެފައިވާކަން ފާހަގަކުރައްވާ މިނިސްޓަރު ވިދާޅުވީ އިންސާފުލިބުމުގައި ހުރި ގޮންޖެހުންތަކާ މެދު ވެސް މިއަދު މަޝްވަރާ ކުރެވުނު ކަމަށެވެ.
އޭގެ އިތުރުން މިނިސްޓަރު ވިދާޅުވީ ހޭލުންތެރިކަމުގެ ޕްރޮގްރާމެއް ކުރިއަށް ގެންދާއިރު މުޖުތަމައުގައި އުޅޭ ޒުވާނުންގެ އަޑާއި އެފަދަ ހާދިސާތައް ދިމާވެފައިވާ ކުދިންގެ އަޑުވެސް އަހަންޖެހޭ ކަމަށެވެ. އަދި ޖިންސީ އަނިޔާކުރުމާ މެދު ބަޔަކު ދެކޭގޮތް ބަދަލުކުރުމަކީ ފަސޭހަކަމެއް ނޫން ކަމަށާއި ޖިންސީ އަނިޔާއާ މެދު މީހުން އެގޮތަށް ދެކޭ ސަބަބު ހޯދަން ޖެހޭ ކަމަށް ވެސް ވިދާޅުވި އެވެ.
އެ ބައްދަލުވުމުގައި ޔުނިސެފާއި، މަޖިލީހުގެ ނައިބު ރައީސްއާއި އެޓާނީ ޖެނެރަލް އަދި ޕްރޮސެކިއުޓާ ޖެނެރަލުގެ އިތުރުން ފުލުހުންނާއި، ޖޭއެސްސީން، ސަރުކާރު ބައެއް މިނިސްޓްރީތަކާއި، އެޗްޕީއޭގެ އިތުރުން 13 އެންޖީއޯއިން ބައިވެރިވެފައިވެ އެވެ.
