ފްލެޓް ކޮމިޓީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަސްލަމް ވިދާޅުވީ، މާލެ ރަށްވެހިންގެ ކެޓަގަރީ އަށް 772 ފްލެޓް އިތުރުކޮށްފައިވާ ކަމަށެވެ.
ފްލެޓްތަކުގެ މައްސަލަ ބަލާ ކޮމެޓީން މިއަދު ވަނީ H4 (ޑޮކްޓަރުންނާއި ނަރުހުންނަށް ހާއްސަ) އަދި H5 (ޓީޗަރުންނަށް ހާއްސަ) ކެޓަގަރީގެ އިތުރުން H8 (މާލޭ ރަށްވެހިންނަށް ހާއްސަ) އަދި H10 (ނުކުޅެދުންތެރިކަން ހުންނަ ފަރާތްތަކާއި އާއިލާތަކަށް ހާއްސަ) ކެޓަގަރީގެ ދަށުން ފްލެޓް ލިބުނު މީހުންގެ ވަގުތީ ލިސްޓް އާންމުކޮށްފަ އެވެ.
މިނިސްޓަރު އަސްލަމް ވިދާޅުވި ގޮތުގައި ހަތަރު ކެޓަގަރީއަކުން ފްލެޓްދޭ އަދަދު މަދުކޮށް، ކުރިން މާލޭ ރަށްވެހިންނަށްދޭން ކަނޑައެޅި 1000 ފްލެޓުގެ ބަދަލުގައި މިހާރު ދޭން ނިންމާފައި ވަނީ 1772 ފްލެޓެކެވެ.
ގެނެސްފައިވާ ބަދަލު:
- ޑޮކްޓަރުންނާއި ނަރުހުންގެ ކެޓަގަރީގެ 475 ފްލެޓުގެ ބަދަލުގައި 233 ފްލެޓް
- ޓީޗަރުންނަށް ހާއްސަ ކުރި ފްލެޓުން 625 ފްލެޓުގެ ބަދަލުގައި 523 ފްލެޓް
- އެކަނިވެރި މައިންނާއި ބަފައިންނަށް - 423
- 18 އަހަރާ 40 އަހަރުގެ ކެޓަގަރީ - 805
- މާލޭ ރަށްވެހިން 1000 ގެ ބަދަލުގައި 1772
އަސްލަމް އިތުރަށް ވިދާޅުވީ މާލޭގެ ރަށްވެހިންނަށް ހާއްސަކޮށް ކެޓަގަރީއެއް އޮތްނަމަވެސް އެހެން ކެޓަގަރީތަކުގައި ވެސް މާލޭގެ ރަށްވެހިން އެބަ ތިބި ކަމަށެވެ. އެގޮތުން ޑޮކްޓަރުންނާއި ނަރުހުންގެ ކެޓަގަރީއަށް ކުރިމަތިލި މީހުންގެ 15 އިންސައްތައަކީ މާލޭގެ ރަށްވެހިން ކަމަށާއި ޓީޗަރުންގެ ދިހަ ޕަސެންޓަކީ ވެސް މާލޭގެ ރަށްވެހިން ކަމަށެވެ. އަދި އެކަނިވެރި މައިންބަފައިންގެ 26 އިންސައްތައަކީ ވެސް މާލޭގެ ރައްޔިތުންކަން ފާހަގަކުރައްވާ ވިދާޅުވީ 18 އަހަރާއި 40 އަހަރާ ދެމެދުގެ ކެޓަގަރީއަށް 9221 މީހަކު ކުރިމަތިލި ނަމަވެސް މާލޭގެ ރައްޔިތުންގެ ތެރޭގައި ހިމެނެނީ އެންމެ އަށް އިންސައްތަ ކަމަށެވެ.
އަސްލަމް ވިދާޅުވީ، މާލޭގެ ރައްޔިތުންގެ ތެރެއިން މާލޭގައި 5122 އާއިލާ މާލޭގައި އުޅެމުން އަންނައިރު އެމީހުންނަކީ އިތުރު އެހެން ތަނެއްގައި ދިރިއުޅޭނެ ގޯއްޗެއް ވެސް ނެތް މީހުން ކަމަށެވެ. އަދި އެމީހުންނަށް ދާނެ އިތުރު ތަނެއް ނެތްކަންވެސް ފާހަގަކުރެއްވި އެވެ.