ގައުމީ ޔުނިވާސިޓީގެ ޑީން އޮފް ރިސާޗު ޑރ. ރަހީމާ އަބްދުއްރަހީމް ވިދާޅުވި ގޮތުގައި މިހާރު އުމުރުން 18 އަހަރުން ދަށުގެ ކުދިންގެ އެންޓި ބޮޑީ ޓެސްޓް ހަދަމުން އަންނައިރު ހުރިހާ އުމުރުފުރާއެއްގެ މެދުގައި އެ ޓެސްޓް ހެދުމަށް ގާތްގަނޑަކަށް ހަތަރުވަރަކަށް ހަފުތާ ނަގާނެ އެވެ.
ޑރ. ރަހީމާ ވިދާޅުވީ އުމުރުފުރާގެ މެދުގައި އެންޓިބޮޑީ ޓެސްޓް ހެދުމަށް މީހުން ނަގަމުންދަނީ ރެންޑަމްކޮށް ކަމަށެވެ. އެގޮތުން ސްކޫލުތަކާއި ގުޅިގެން އެ ޓެސްޓް މިހާރު ހަދަމުން އަންނައިރު ވެސް ނަގަމުންދަނީ ރެންޑަމްކޮށް ކަމަށް ވިދާޅުވި އެވެ. އެގޮތަށް ރެންޑަމްކޮށް ނަގަމުންދަނީ މުޖުތަމައުގައި ބަލި އޮތް މިންވަރު ރަނގަޅަށް ދެނެގަންނަން ކަމަށް ވިދާޅުވި އެވެ.
އޭގެ އިތުރުން ޑރ. ރަހީމާ ވިދާޅުވީ މިހާރު ޓެސްޓްކުރަމުންދާ 18 އަހަރުގެ އުމުރުފުރާގެ ޓެސްޓްތައް ހަފުތާއެއްގެ ތެރޭގައި ނިންމާލުމަށް އަމާޒު ހިފާފައި ހުރިއިރު ހުރިހާ އުމުރުފުރާއެއް ނިންމާލެވޭނެ ކަމަށް ބެލެވެނީ ހަތަރު ހަފުތާ ފަހުން ކަމަށެވެ.
އެންޓިބޮޑީ ޓެސްޓް ހަދަމުންދަނީ ރާއްޖޭގައި ކޮވިޑަށް ހުށަހެޅިފައިވާ އާބާދީގެ އިންސައްތަ ދެނެގަތުމަށެވެ. މިހާރު މާލޭ ސަރަހައްދުގައި ކުރިއަށްދާއިރު އަތޮޅު ތެރޭގައި ވެސް އެ ޓެސްޓްތައް ހަދަން ނިންމާފައިވެ އެވެ.