ނޫސްވެރިކަމުގެ އިނާމް ދިނުމުގެ ހަފްލާގައި ވާހަކަ ދައްކަވަމުން ރައީސް ސޯލިހް ވިދާޅުވީ، ނޫސްވެރިކަމުގެ ހަފްލާތައް ކުރިއަށްދާއިރު ރިލްވާން އަދި ޔާމީންގެ ހަނދާންތައް އާވާކަމަށެވެ. އެގޮތުން ރައީސް ވިދާޅުވީ ރިލްވާނާއި ޔާމީނަށް އިންސާފު ހޯދައިދިނުމަށް ކުރަމުން އަންނަ މަސައްކަތް ހުއްޓާނުލައްވާނެ ކަމަށެވެ.
ނޫސްވެރިންގެ ޒިންމާއަކަށް ވާންޖެހޭނީ ރައްޔިތުންނަށް ކަންކަމުގައި އެންމެ ރަނގަޅު މަގު ދެއްކުންކަން ފާހަގަކޮށް ރައީސް ވިދާޅުވީ، މި ޒަމާނުގެ ނޫސްވެރިކަމަކީ މުޖުތަމައުގެ ކަންކަން ބޭނުން މިސްރާބަކަށް ބަދަލުކޮށްލުމުގެ ވަރަށް މުހިއްމު ދައުރެއް އަދާކުރާ ވަސީލަތެއް ކަމަށެވެ. އަދި ނޫސްވެރިޔާގެ އަތުން، ނޫސްވެރިކަމުގެ ހަޤީޤީ ލަގަން ދޫވެއްޖެނަމަ ނޫސްވެރިކަމުން މުޖުތަމައުއަށް ލިބެންޖެހޭ ފައިދާއަށް ވުރެ، ލިބޭ ގެއްލުން ބޮޑުވުމަކީ އެކަށީގެންވާ ކަމެއް ކަމަށް ރައީސް ވިދާޅުވި އެވެ.
ރައީސް ސޯލިހް ވިދާޅުވީ އެއިރެއްގައި މުޖުތަމައުގައި ހިނގާ ބޮޑެތި މައްސަލަތައް ހައްލުކުރުމަށް މަސައްކަތްކުރުމަކީ ނޫސްވެރިންގެ ޒިންމާއެއް ކަމަށެވެ. އެގޮތުން މަސްތުވާތަކެތީގެ މައްސަލަތަކާއި، ހަރުކަށި ފިކުރުގެ މައްސަލައަކީވެސް ހައްލު ހޯދަންޖެހިފައިވާ އިޖުތިމާއީ ބޮޑެތި މައްސަލަތައް ކަމަށް ވިދާޅުވި އެވެ. އަދި މަސްތުވާތަކެއްޗާ ދުރަށްދާނެގޮތާއި، އެފަދަ މައްސަލަތައް ހައްލުކުރާނެގޮތް ބުނެދީ، އެކަންކަން ހައްލުކުރުމުގެ ގޮތުން ތަކުރާރުކޮށް ލިޔެވޭ ލިޔުންތައް އިތުރުކުރަންޖެހޭ ކަމަށް ވިދާޅުވި އެވެ.