ބޮންޑޭ މިހެން ވިދާޅުވީ، މާފުށީ ކުނިގޮނޑުގެ މައްސަލައަށް އަލިއަޅުވާލައި، ސީއެންއެމްގެ އިތުރުކާފު ޕްރޮގުރާމުގައި ވާހަކަ ދައްކަވަމުންނެވެ.
ބޮންޑޭ ވިދާޅުވީ، ކުނީގެ މައްސަލަތައް ބޮޑުވެގެން އުޅެނީ އެކަން މެނޭޖުކުރާނެ ފައިސާ ނެތިގެން ނޫން ކަމަށާއި މައްސަލައަކީ މައްސަލައަކީ ކުނި ވަޒީރު ސައިންޓިސްޓަކަށް ވެގެން އުޅޭތީ ކަމަށެވެ. އެންވައިރަމެންޓް މިނިސްޓަރު ޑރ.ހުސައިން ރަޝީދު ހަސަންއަށް ބަހުގެ ހަމަލާއަށް އަމާޒުކުރައްވައި ބޮންޑޭ ވިދާޅުވީ ތިމާވެށި ސައިންސަށް ހަދައިގެން ގޮނޑު ދިރާސާ ކުރަން އޮއްވާ މުޅި ރާއްޖެ ގޮނޑުވާން ފަށައިފި ކަމަށެވެ. އަދި "ކުނި" ވަޒީރުގެ ޒިންމާއަކީ ކޮބައިތޯ ސުވާލު އުފައްދަން ޖެހެނީ މި ސަބަބާއި ހުރެ ކަމަށްވެސް ބޮނޑޭ ވިދާޅުވިއެވެ.
ބޮންޑޭ ވިދާޅުވީ، ސައިންސްވެރިއަކަށް ވެގެން ކުނިން ދިރާސާކޮށް އެއިން ހަކަތަ އުފެއްދުމާއި ބެހޭ ތަހުލީލުތަށް ކުރުމަކީ އެހެން ބައެއް ކުރަންޖެހޭ ކަމެއް ކަމަށާއި، ވަޒީރުގެ މަސްއޫލިއްޔަތަކީ ވުޒާރާގެ މެންޑޭޓު ތަންފީޒު ކުރުން ކަމަށެވެ. އެގޮތުން ވަޒީރުގެ މެންޑޭޓު ވަޒީރަށް ގެނގެން ޖެހޭނެ ކަމަށާއި، އެއީ ރައީސުލްޖުމްހޫރިއްޔާ އަބަދު ވިދާޅުވާން ޖެހޭނެ އެއްޗެއް ނޫންކަމަށްވެސް ބޮންޑޭ ވިދާޅުވިއެވެ.
ބޮންޑޭ ވިދާޅުވީ، ރަސްފަންނަށް ކުންޏާއި ނަޖިސް ލައްގާ ވާހަކަ އޭރު ވަރަށް ގިނައިން ދެއްކި ކަމަށާއި ނަމަވެސް މިހާރުވެސް ލައްގާ ކަމަށެވެ. އަދި އެކަންކަން ހައްލުކުރަން 2023 މާލަސް ކަމަށާއި، އެކަން ބަލައި ނުގަނެވޭނެ ކަމަށެވެ. އަދި ބޭރު ގައުމުތަކުން ރާއްޖޭގެ ކުނީގެ މައްސަލަތައް ހައްލުކުރަން އެކި ނަންނަމުގައި ފަންޑު ދީފައި އެބަހުރިކަން ބޮންޑޭ ފާހަގަކުރިއެވެ.
މާފުށީގައި ކުނި މެނޭޖުކުރުމުގެ ގަވާއިދާ ހިލާފަށް ތަކުރާރުކޮށް އަމަލުކުރަމުންދާ މައްސަލާގައި ބޮންޑޭ އަންނަނީ މީސްމީޑިއާގައިވެސް ވަރަށް ބޮޑަށް ކަންބޮޑުވުން ފާޅުކުރަމުންނެވެ. އެގޮތުން މިމައްސަލާގައި ކަމާއިބެހޭ ފަރާތްތަކުން އިހުމާލުވާކަމުގެ ތުހުމަތު ވަރަށް ބޮޑަށް ވަނީ ކުރެވިފައެވެ.