ޑރ އިޔާޒް މިހެން ވިދާޅުވެފައި މިވަނީ، ރައްޔިތުންގެ މަޖިލީހުގެ މިއަދުގެ ޖަލްސާއަށް އެމްޑީޕީގެ ޗެއާޕާސަން ހަސަން ލަތީފް ހުށަހަޅުއްވާފައިވާ ގަރާރުގެ ބަހުސްގައި ވާހަކަ ދައްކަވަމުން މަޖިލީހުގެ ގިނަ މެމްބަރުންތަކެއް، މިއުޒިކަކީ ހަރާމް އެއްޗެއް ނޫން ކަމަށާއި، މިއުޒިކް ހަރާމް އެއްޗެއްކަމަށް ކަނޑައެއް ނޭޅޭނެކަމަށް ދޭހަވާފަދަ މޭރުމަކުން ވާހަކަ ދެއްކެވުމާއި ގުޅިގެންނެވެ.
ޑި އިޔާޒް ކުރެއްވި ޓްވީޓެއްގައި ވިދާޅުވީ ހަލާލު ހަރާމް ކަނޑަ އެޅުން އެއީ ރައްޔިތުންގެ މަޖިލީހުގެ މެމްބަރަކަށް ވީނަމަވެސް ލިބިގެންވާ ބާރެއް ނޫން ކަމަށާއި، އެކަން ކަނޑަ އަޅުއްވާނީ ﷲ އާއި ރަސޫލާ ﷺ ކަމަށެވެ. އެހެންކަމުން ރައްޔިތުންގެ މަޖިލީހުގެ މެމްބަރުން ސައިޒް އޮޅިވަޑައިގެން ނޫޅުއްވުމަށް ނަސޭހަތްތެރިވާ ކަމަށްވެސް އިޔާޒް ވަނީ ވިދާޅުވެފައެވެ.
އިޔާޒް މިހެން ވިދާޅުވީރު، ބައެއް ބާވަތުގެ މިއުޒިކަކީ ހަރާމް އެއްޗެއް ކަމަށް ރާއްޖޭގެ ދީނީ އިލްމުވެރިން ވިދާޅުވަމުންދާ ކަމަށާއި އިލްމުވެރިންނަށް އެހެން ވިދާޅު ނުވެވޭނެކަމަށްބުނެ ބައެއް މެމްބަރުން މިއަދުގެ ޖަލްސާގައި ވަނީ ވާހަކަ ދައްކަވާފައެވެ.