ފްލެޓް ނުލިބުނު މީހުންނަށް ދެން އޮތް ސްކީމެއްގެ ދަށުން ފްލެޓް ޔަގީންވާނެތޯ މިއަދު މަޖިލީހުގައި ކުރެވުނު ސުވާލެއްގައި މިނިސްޓަރު ވިދާޅުވީ ފްލެޓް ނުލިބުނު ކޮންމެ މީހަކަށް ފްލެޓެއް ދޭނެ ކަމަށް ޔަގީންކަމާއެކު ދަންނަވަން ކެރިވަޑައިނުގަންނަވާ ކަމަށެވެ.
އެހެންނަމަވެސް އެމީހުންގެ ހާލަތަށް ބަލައި ދެން އޮތް ސްކީމުގައި އެމީހުންނަކީ އެ ސްކީމަށް ކުރިމަތިލާފައިވާ ބައެއްގެ ގޮތުގައި ފުރުސަތު ދެއްވާނެ ކަމަށް މިނިސްޓަރު ވިދާޅުވި އެވެ.
ރައީސް އަބްދުﷲ ޔާމީންގެ ވެރިކަމުގައި ހުޅުމާލޭ ދެވަނަ ފިޔަވަހީގައި ތަރައްގީކުރަން ފެށި 7000 ފްލެޓަށް އެދި 25000 އެއްްހާ މީހުން ކުރިމަތިލި އެވެ. އޭގެ ތެރެއިން އެންމެ ހައްގުވާ މީހުން ކަނޑައަޅައި، ފްލެޓްތައް ލިބުނު މީހުންގެ ދާއިމީ ލިސްޓު މީގެ ދުވަސްކޮޅެއް ކުރިން އިއުލާންކުރިއިރު ލިސްޓާ ގުޅިގެން ވެސް ގިނަ ކަންބޮޑުވުންތަކެއް އެބަ ހުއްޓެވެ.
މި ފަހުން ރައީސް އިބްރާހީމް މުހައްމަދު ސޯލިހު ވަނީ ފްލެޓް ލިސްޓުގައި މައްސަލަތަކެއް ހުރިނަމަ އެ ލިސްޓު އިތުރަށް ބަލައި ހައްގުވެރި ފަރާތްތަކަށް ފްލެޓް ހަވާލުކުރާނެ ކަމަށް ވިދާޅުވެފަ އެވެ.
