ރައީސް ސޯލިހް މިހެން ވިދާޅުވީ އަންނަ އެޕްރީލް މަހުގެ 10 ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބަށް ސަރުކާރު ނިސްބަތްވާ އެމްޑީޕީން ކެމްޕެއިން ކުރުމަށްޓަކައި ރަށްވެހި ފަތިސް ކެނޑިޑޭޓުންނާއި ކެމްޕެއިން ޓީމްތަކާއިއެކު މިރޭ ބޭއްވި ބައްދަލުވުމުގައި ބ. ހިތާދޫ ކައުންސިލުން އެ ރަށުގެ ސިއްހީ މަރުކަޒަށް ދިމާވެފައިވާ މައްސަލަތައް ވީހާވެސް އަވަހަކަށް ހައްލުކޮށްދިނުމަށް އެދުމުން އެކަމަށް ދެއްވި ޖަވާބުގައެވެ.

ހިތާދޫ ކައުންސިލްގެ ރައީސް އަބްދުލް އަޒީޒް މުހައްމަދު ވަނީ އެ ރަށުގެ ސިއްހީ މަރުކަޒުގެ ހިދުމަތް މިހާރު ލިބެމުންދަނީ 16 ގަޑިއިރަށް ކަމަށާއި އެހެންކަމުން ސިއްހީ މަރުކަޒު 24 ގަޑިއިރަށް ބަދަލުކުރަން ހުށަހަޅުއްވާފަ އެވެ. އަދި ޑޮކްޓަރެއް ނެތުމުގެ ދަތިކަން ކުރިމަތިވަމުންދާތީ އެކަން ހައްލުކޮށްދެއްވުމަށްވެެސް ވަނީ އެދިވަޑައިގެންފަ އެވެ.

މިކަމާއި ގުޅިގެން ރައީސް ސޯލިހް ވިދާޅުވީ، ހިތާދޫ ސިއްހީ މަރުކަޒު 24 ގަޑިއިރަށް ބަދަލުކުރުމަށް ހަދަންޖެހޭ ސާވޭތައް ހަދައި ބަލަންޖެހޭ ކަންކަން ބަލާނެ ކަމަށެވެ. އަދި ރާއްޖެއަށް ކުރިމަތިވެފައިވާ ޑޮކްޓަރުންގެ ދަތިތައް ހައްލުކުރުމަށް ކުރެވޭ މަސައްކަތުގެ ތެެރެއިން މިހާރު ނޭޕާލާއި ސްރީލަންކާއިން 163 ޑޮކްޓަރުން ރާއްޖެއަށް ގެނެއުމުގެ މަަސައްކަތް ކުރަމުންދާ ކަމަށެވެ. އެގޮތުން މިއަހަރު ޖޫން މަހުގެ ނިޔަލަށް މި ޑޮކްޓަރުން މާލެއަށް އައުމުގެ މަސައްކަތް ފަށާނެ ކަމަށް ރައީސް ވިދާޅުވިއެވެ. 

ރައީސް ވަނީ އޭގެ ތެރެއިން އެއް ޑޮކްޓަރަކު އެރަށަށް ފޮނުވާނެ ކަމަށް ވެސް ވިދާޅުވެފަ އެވެ.