އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަންޔަން ޖައިޝަންކަރު ރާއްޖެއަށް ކުރެއްވި ދަތުރުފުޅުގެ ތެރެއިން، އުތުރު ތިލަފަޅުގައި ކޯސްޓްގާޑުގެ ބަނދަރަކާއި ޑޮކްޔާޑެއް އެޅުމަށް ރާއްޖެއާ އެގައުމާ ދެމެދު އެއްބަސްވުމެއްގައި ސޮއިކޮށްފައިވާ އިރު އެ އެއްބަސްވުމުގެ ޑްރާފްޓް ކޮޕީއެއްް ކަމަށް ބުނާ ލިޔުމެއް ކުރީގެ ހޯމް މިނިސްޓަރު އުމަރު ނަސީރު ވަނީ ލީކުކޮށްލާފަ އެވެ. އަދި މައުލޫމާތު ލިބުނީ އެމްއެންޑީއެފްގެ އިސް ފަރާތްތަކުގެ ކިބައިން ކަމަށް ބައެއް ނޫސްތަކުގައި ރިޕޯޓުކޮށްފައިވެ އެވެ.
ލީކުކޮށްލި ކަމަށް ބުނާ އެގްރީމަޓާއި ގުޅިގެން އެމްއެންޑީއެފްގެ ޖެނެރަލުން ވަނީ ނޫސްވެރިންގެ ބައްދަލުވުމެއް ބާއްވައި، އެ އެގްރީމެންޓަކީ ފޭކެއްކަން ރައްޔިތުންނަށް ކަށަވަރުކޮށް ދެއްވާފައެވެ.
ރޭ ކުރީގެ ޑިފެންސް މިނިސްޓަރު އާދަމް ޝަރީފު އެކަމާ ގުޅިގެން ކުރެއްވި ޓްވީޓެއްގައި ވިދާޅުވީ، ސަރުކާރުން އުތުރުތިލަފަޅުގެ މައްސަލައިގެ ތެރެއަށް ސިފައިން ވެއްދުމަކީ ސިފައިންނަށް ކުރާ އިތުބާރު ގެއްލިގެން ހިނގައިދާނެ ކަމެއް ކަމަށެވެ.
އުތުރުތިލަފަޅުގެ އެއްބަސްވުމުގެ މައްސަލައާ ގުޅިގެން ޑިފެންސް މިނިސްޓްރީން މީގެ ކުރިން ނެރުނު ނޫސްބަޔާނެއްގައި، ރާއްޖޭގެ ގައުމީ ދިފާއީ ބާރަށް ރައްޔިތުންގެ ހިތްތަކުގައި އޮންނަ އިތުބާރާއި އިހްތިރާމާއި ގަދަރު ނަގާލަން ކުރާ މަސައްކަތަށް ފުރުސަތު ނުދޭނެ ކަމަށް ވަނީ ބުނެފަ އެވެ.
އެ މައްސަލައާ ގުޅިގެން ސިފައިންގެ އިސް ވެރިއެއްގެ ރިސްވަތުގެ މައްސަލައެއް ބަލައިދިނުމަށް އޭސީސީއަށް ހުށަހެޅި ނަމަވެސް، އެ ކޮމިޝަނުން ނިންމާފައި ވަނީ އެ މައްސަލަ ނުބެލުމަށެވެ.
