"ވަކިވަކި ޑިޕާޓްމަންޓު ތަކުން ހިދުމަތްދޭ ގަޑީގެ އިތުރުން ލެބޯޓްރީ ހިދުމަތްދޭ ގަޑިތައް އައިޖީއެމްއެޗުން މިއަދު އާންމު ކުރީ، އެ ހޮސްޕިޓަލުން ކުރި އިއުލާނެއްގައެވެ.
އެގޮތުން ސްޕެޝަލިސްޓް އޯޕީޑީ ކޮންސަލްޓޭޝަން ގަޑިއަކީ 09:00 އިން 16:00 އަށް ކަމަށް އައިޖީއެމްއެޗުން ބުނެއެވެ. އަދި ޖެނެރަލް އޯޕީޑީގެ ހިދުމަތް ދޭނީ ހެނދުނު 10:00 އިން 14:00 އަށް އަދި ހަވީރު 16:00 އިން 00:00 އަށް ކަމަށް އައިޖީއެމްއެޗުން ބުނެއެވެ. އަދި ލެބޯޓްރީ ހިދުމަތްދޭނީ ހެނދުނު 08:00 އިން 16:00 އަށް ކަމަށް ހާމަކޮށްފައިވެއެވެ.
މީގެ އިތުރުން ރޭޑިއޮލޮޖީ ޑިޕާޓްމަންޓުގެ އެމްއާރްއައި، އެކްސްރޭ އަދި އަލްޓްރާސައުންޑް ހިދުމަތް ދޭނީ ހެނދުނު 09:00 އިން 16:00 އަށް ކަމަށް އައިޖީއެމްއެޗުން މައުލޫމާތު ދެއެވެ. އަދި ރޭޑިއޮލޮޖީ ޑިޕާޓްމަންޓުގެ ސީޓީ ސްކޭންގެ ހިދުމަތް ދޭނީ 09:00 އިން 14:00 އަށް ކަމަށް އައިޖީއެމްއެޗުން ބުނެއެވެ.
އައިޖީއެމްއެޗުގައި ރޯދަ މަހު ފިޒިއޯތެރަޕީގެ ހިދުމަތް ދޭނީ 09:00 އިން 16:00 އަށް ކަމަށާއި، އީސީޖީ ގެ ހިދުމަތް ދޭނީ 09:30 އިން 13:30 އަށް ކަމަށް އެ ހޮސްޕިޓަލުން ބުނެއެވެ. އަދި އިކޯކާޑިއޯގްރަފީގެ ހިދުމަތް ދޭނީ 09:00 އިން 13:00 އަށް ކަމަށާއި، ސްޕީޒް ތެރަޕީގެ ހިދުމަތް ދޭން ނިންމާފައިވަނީ 09:00 އިން 15:00 އަށް ކަމަށް އަދި އެންޑޮސްކޯޕީ އާއި ކޮލޮނޮސްކޯޕީގެ ހިދުމަތް ދޭން ނިންމާފައިވަނީ 09:00 އިން 11:30 އަށް ކަމަށް އައިޖީއެމްއެޗުން މައުލޫމާތު ދެއެވެ.
މި ހިދުމަތްތައް ކަނޑައެޅިފައިވާ ވަކި ވަގުތުތަކެއްގައި ދިން ނަމަވެސް، ޓްރޯމާ އެންޑް އެމަޖެންސީގެ ހިދުމަތް 24 ގަޑިއިރު ކުރިއަށްދާނެ ކަމަށް އައިޖީއެމްއެޗުން ބުނެއެވެ.