އޭއެފްސީ ކަޕުގައި ރާއްޖޭގެ އީގަލްސްއާ އިންޑިޔާގެ ބެންގަލޫރު އެފްސީ އަންނަ އަންގާރަ ދުވަހު ކޮލިފައިންގައި ކުޅޭ މެޗަށް މާދަމާ މާލެ އަންނަ ގޮތަށް ހުރިހާ ކަމެއް ނިމިފައިވާއިރު، މާލޭގައި ކާފިއު އިއުލާންކޮށް މަގު މައްޗަށް މީހުން ނުކުތުންވެސް މިރެއިން ފެށިގެން މަނާވާނެއެވެ. އެޗްޕީއޭއިން ކަނޑައަޅާފައިވާ ގޮތުން، މިރޭ ނުވައަކުން ކާފިއު ފެށޭނެއެވެ. ކާފިއު އިއުލާކޮށްފައިވަނީ ރޭގަނޑު ނުވައަކުން ފަތިހު ހަތަރަކަށް އާއްމުކޮށް އެއްވެސް މީހަކަށް ބޭރަށް ނުނުކުމެވޭ ގޮތަށެވެ.
އާއްމުކޮށް ރޯދަ މަހު މެޗުތައް ފެށެނީ ރޭގަނޑު ދިހައެއް ޖަހާއިރުއެވެ. ހަވީރު މެޗު ކުޅޭނަމަ ދިވެހި ކުޅުންތެރިން މެޗު ކުޅެން ޖެހޭނީ ރޯދައަށް ތިބެއެވެ. ރޯދައަށް ތިބެ ބޮޑެތި މެޗުތައް ކުޅުން ރާއްޖޭގައި އާއްމު ނޫން ނަމަވެސް ދުނިޔޭގެ ފެންވަރުގައި ވަރަށް ގިނަ ކުޅުންތެރިން ރޯދައަށް ތިބެ މެޗު ކުޅެއެވެ.
އިންޑިޔާގައި އިއްޔެ ރެކޯޑް އަދަދަކަށް ޕޮޒިޓީވް ކޭސްތައް ފެންމަތިވެފައިވާއިރު ބެންގަލޫރު އެފްސީގެ ކޭމްޕުން ބައެއް ކުޅުންތެރިންވަނީ މިދިޔަ މަހުގެ ތެރޭގައި ކޮވިޑަށް ޕޮޒިޓިވްވެފައެވެ. ޕޮޒިޓިވްވީ ކުޅުންތެރިންގެ ތެރޭގައި ކެޕްޓަން ސުނިލް ޗެތްރީވެސް ހިމެނެއެވެ.