ރައްޔިތުންގެ މަޖިލީހުގެ އިމްތިޔާޒަށް އަރައިގަތުމުގެ ތުހުމަތުގައި ދައުވާކޮށްދޭން ޕްރޮސިކިއުޓަ ޖެނެރަލްގެ އޮފީހުގައި އެދިފައިވާ ޑިފެންސް މިނިސްޓްރީގެ ނައިބު ހަސަން ޒަމީލްގެ މައްސަލަ މަޖިލީހުގެ އިމްތިޔާޒާއި ސުލޫކީ ކޮމިޓީން ބޭރުކޮށްލި މައްސަލަ އާ ގުޅިގެން، އެމްޑީޕީގެ ސުޕަ މެޖޯރިޓީ އޮވެމެ އެ މައްސަލަ ބޭރުކޮށްލުމުން އެމްޑީޕީ ބައެއް މެމްބަރުން ވަނީ ނުރުހުން ފާޅުކޮށް ފާޑުކިޔާފައެވެ.

އެގޮތުން ރައީސް ނަޝީދުގެ ފޮޓޯ ވިއްކައިގެން ހޮވިގެން ތިބި މެންބަރުން، އެމަނިކުފާނު އެންމެ ހާލުގާ އޮންނެވި ދުވަހު، ކަރަށް ފައިންއަރަން ހިފާލާނީ ވަރަށް ގޮތެއް ފޮތެއް ނެތުމުން ކަމަށް ވެސް ބައެއް މެމްބަރުން ވަނީ ފާޑުކިޔާފައެވެ. 

އެމްޑީޕީއިން މަޖިލީޖހުގެ މެޖޯރަޓީ ހޯދީ ރައީސް ނަޝީދު ފޮޓޯވިއްކާގެން ކަމަށް ވިދާޅުވެ ފާޑުކިޔަމުންދާތީ މިއަދުގެ ނޫސްވެރިންގެ ބައްދަލުވުމުގައި ކުރެވުނު ސުވާލަކަށް ޖަވާބުދެއްވަމުން ރައީސް ސޯލިހް ވިދާޅުވީ، 2019ވަނަ އަހަރު އެމްޑީޕީއަށް މަޖިލިީހުގެ މެޖޯރަޓީ ލިބުނީ ސަރުކާރުވެސް ހިމެނޭހެން ވަރަށް ގިނަ ބައެެއްގެ ބުރަ މަސައްކަތުން ކަމަށެވެ.  

ރައީސް ސޯލިހް ވިދާޅުވީ އޭރުގެ އިންތިހާބުތަކުން ލިބިފަހުރި އަދަދާ 2019ގައި އެމްޑީޕީއަށް ލިބުނު ކާމިޔާބީ އަޅާކިޔާލުމުން، އެމްޑީޕީއަށް 2019ގަ ލިބުނު ކާމިޔާބީ އަކީ ވަރަށް ގިނަ ބައެއްގެ މަސައްކަތްކަން ވަރަށް ރަނގަޅަށް ސާފުވާނެ ކަމަށެވެ. އަދި އެކަމުގައި ރައީސް ނަޝީދުގެ މަސައްކަތްޕުޅުވެސް ހިމެނޭކަން ފާހަަގަކުރަމުން ރައީސް ސޯލިހް ވިދާޅުވީ އެންމެ ބޮޑު މަސައްކަތްތަކެއް ކުރެއްވި އެއް ބޭފުޅަކީ ރައީސް ނަޝީދުކަން އެމަނިކުފާނުވެސް ގަބޫލުފުޅުކުރައްވަން ކަމަށެވެ. 

ރައީސް ސޯލިހް އިތުރަށް ވިދާޅުވީ އެހެންކަމުން މިއަދު މިއީ ސިޔާސީ ގޮތުން ހަލަބޮލިވާންވީ ވަގުތެއް ނޫންކަމަށާއި ކޮވިޑް-19ގެ މިދަނޑިވަޅުގައި ހައްލުކުރަން އަދި ވިސްނަންޖެހޭ އެޔަށްވުރެ ބޮޑެތި ކަންކަން އެބަހުރި ކަމަށެވެ. ރައީސް ސޯލިހް ވިދާޅުވީ، މިވަގުތަކީ ކޮވިޑްގެ ހާލަތުން ގައުމު ސަލާމަތް ކުރުމަށް އިސްކަންދީގެން ރައްޔިތުންގެ މަޖިލީހާއި ސަރުކާރާއި ގުޅިގެން މަސައްކަތްކުރަންވީ ވަގުތު ކަަމަށާއި، އެމަގުން ހުރިހާ ބޭފުޅުންވެސް ކުރިއަށް ދިޔުމަށް އެދޭކަމަށެވެ. 

މަޖިލީހުގެ އިމްތިޔާޒާއި ސުލޫކީ ކޮމިޓީއަށް ރައީސް ނަޝީދު ފޮނުއްވި މައްސަލަ ބޭރުކުރުމުން އެމްޑީޕީ ތެރޭގައި ވަނީ ވަރަށް ބޮޑު ނުތަނަވަސް ކަމެއް އުފެދިފައެވެ.