4 މީހެއްގެ މައްޗަށް ދައުވާ ކުރިކަން ހާމަކުރެއްވީ ކޮމިޝަނަރު އޮފް ޕޮލިސް، މުހައްމަދު ހަމީދު މިއަދު ކުރެއްވި ޓްވީޓެއްގައެވެ. ސީޕީ ކުރެއްވި ޓްވީޓްގައި ދައުވާ އުފުލީ ކޮން ބައެއްގެ މައްޗަށް ކަމެއް ވިދާޅުވެފައެއް ނުވެ އެވެ.

މިހަމަލާއާ ގުޅިގެން ނިންމި ނިންމުންތަކާއި ގުޅިގެން މިއަދު ޕްރޮސިކިއުޓާ ޖެނެރަލްގެ އޮފީހުން ވެސް ނޫސްވެރިންނާއި ބައްދަލު ކުރަން ވަނީ ނިންމަވާފައެވެ. އެ ޕްރެސް ކޮންފަރެންސް ފެށޭނީ މިއަދު 2:00 ގައެވެ. 

އެ ހަމަލާއާ ގުޅިގެން މިހާރު ފަސް މީހެއްގެ މައްޗަށް ފުލުހުން ވަނީ ތަހުގީގުތައް ނިންމާ ދައުވާާކުރަން ޕީޖީ އޮފީހަށް ފޮނުވާފައެެވެ. 

މީގެ ކުރިން ޕީޖީ އޮފީހުގެ މީޑިއާ އޮފިޝަލް އަދި ޕަބްލިކް ޕްރޮސެކިއުޓަރު އަހުމަދު ޝަފީއު "ސީއެންއެމް" އަށް ވިދާޅުވީ، ކުރިން ހައްޔަރުކޮށްފައިވާ ހަތަރު މީހުންގެ އިތުރުން ޖުލައި މަހުގެ 29 ވަނަ ދުވަހު ދައުވާކޮށް ދިނުމަށް އެދި ފުލުހުން ފޮނުވި ނ. މަނަދޫ ނޫރީގެ އަލީ ހައިޝަމްގެ މައްސަލާގައި އެހަފްތާ ތެރޭގައި ގޮތެއް ނިންމާނެ ކަމަށެވެ. އެމައްސަލާގައި ދައުވާކުރުމާ މެދު އެ އޮފީހުން ގޮތެއް ނިންމުމާ އެކު އެމީހުންގެ މައްޗަށް ކުރަނީ ކޮން ދައުވާތަކެއްކަން ސާފުވެގެންދާނެކަމަށް އޭނާ ވިދާޅުވި އެވެ.

ރައީސް ނަޝީދުގެ ހަމަލާއާ ގުޅޭގޮތުން މުހިންމު މައުލޫމާތުތަކެއް ހިއްސާކުރުމަށް ޖުލައި މަހުގެ 25 ވީ އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ކޮމިޝަނަރު އޮޕް ޕޮލިސް މުހައްމަދު ހަމީދު ވިދާޅުވީ، މިހާތަނަށް ބެލި ބެލުމުން ހަމަލާ ރާވާ ހިންގުމުގައި އެންމެ އިސް ދައުރެއް އަދާކޮށްފައިވާ މީހުންނަކީ، ހއ. ހޯރަފުށި، އަލަނާސިގެ، މުހައްމަދު ތަސްލީމް އާއި، ކ. މާލެ، ކުދެހިގެ، އިސްހާގު އާއި، ނ. މަނަދޫ ނޫރީގެ އަލީ ހައިޝަމް ކަމަށެވެ.