މިއެކްސްޕޯގައި މޯލްޑިވްސް ހަލާލް ޓްރެވެލްއިން ރާއްޖެ ތަމްސީލުކޮށްފައިވަނީ، އެމްއެމްޕީއާރްސީއާއި ގުޅިގެންނެވެ. އެމެރިކާގެ ވޮޝިންޓަނުގައި ބޭއްވި މިއެކްސްޕޯއަކީ މުސްލިމް ފަތުރުވެރިކަމަށް ބާއްވާ މިފަދަ އެންމެ ބޮޑު އެއް އެކްސްޕޯއެވެ. އެގޮތުން އެމެރިކާގައި 20 މިލިއަން މީހުންގެ މާކެޓެއް އޮންނައިރު، ދުނިޔޭގެ އެކި ކަންކޮޅުތަކުން ބިލިއަނަކަށްވުރެ ގިނަ މީހުން މިއެކްސްޕޯގައި ތަމްސީލު ކުރެއެވެ. މިއެކްސްޕޯ ބާއްވާފައިވަނީ މިމަހުގެ 20 އިން 21 އަށް އެމެރިކާގެ ވޮޝިންޓަނުގައެވެ.
މި އެކްސްޕޯގެ ތެރެއިން ރާއްޖޭގެ ސްޓޯލްއަށް ޒިޔާރަތްކުރާ ފަރާތްތަކަށް ރާއްޖެއާ ގުޅޭ ތަފާތު މަޢުލޫމާތު ފޯރުކޮށްދީ އަދި މޯލްޑިވްސް ހަލާލް ޓްރެވެލްގެ ޕެކޭޖުތަކުގެ ފުރިހަމަ މައުލޫމާތުވެސް ވަނީ ފޯރުކޮށްދީފައެވެ.
މިއެކްސްޕޯގެ ތެރެއިން ޑރ. ސަނީ އުމަރު ވަނީ ހަލާލް ފަތުރުވެރިކަމާއި ގުޅޭ ގޮތުން ބޭއްވި، ޕެނަލް ޑިސްކަޝަނެއްގައި ބައިވެރިވެފައެވެ. މި ޕެނަލްގައި އޭނާ ވަނީ ރާއްޖޭގައި ހަލާލް ފަތުރުވެރިކަން ފެށިގެންއައި ގޮތާއި މިމާކެޓަކީ ރާއްޖެއަށް ކިހާ މުހިންމު މާކެޓެއްކަމުގެ މައްޗަށް އަލިއަޅުއްވާލައްވައި ވާހަކަދައްކާފައެވެ. އަދި ހަލާލް ޓުއަރިޒަމް ފެށުމަށް މިހާރުވެސް އެކުންފުންޏާއެކު މަސައްކަތް ކުރަމުންދާ އަދާރަން ރިސޯޓު، ކިހާ މޯލްޑިވްސް، ކުޑަ ވިލިނގިލި ރިސޯޓު މޯލްޑިވްސް އަދި ލަކްސް ސައުތު އަރިއެޓޯލް އިން ކޮށްދެއްވާ މަސައްކަތް ސަނީ ފާހަގަކުރެއްވިއެވެ.
މިއެކްސްޕޯގެ ތެރެއިން ރާއްޖޭގެ ސްޓޯލްއަށް ޒިޔާރަތްކުރާ ފަރާތްތަކުގެ މެދުގައި ގުރުއަތުލައިގެން ދެ ފަރާތަކަށް ކުޑަ ވިލިނގިލި ރިސޯޓުގައި 3 ދުވަހުގެ ޗުއްޓީއެއް ހޭދަކުރުމުގެ ފުރުސަތު ލިބޭނެއެވެ.
މިއީ ރާއްޖެއަށް ވަރަށް މުހިންމު މާކެޓަކަށް ވާނެ އެކްސްޕޯއެކެވެ. އެގޮތުން މިއަހަރު މިހާތަނަށްވެސް އެމެރިކާއިން ރާއްޖެ 30،000 އަށްވުރެ ގިނަ ފަތުރުވެރިން އައިސްފައިވާއިރު، އެމެރިކާގައި 6 މިލިއަން މުސްލިމުންގެ އާބާދީއެއް އެބައޮތެވެ.
