ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން، މުވައްޒަފުންނާ ގުޅޭ ކަންކަން ބެލުމުގައި ހޯދޭ ބަޔާންތައް ބަދަލު ކުރާކަން ފާހަގަ ކުރެވުނީ ދެކުނުގެ މެޖިސްޓްރޭޓް ކޯޓެއްގެ މުވައްޒަފަކު ވަޒީފާއިން ވަކިކުރި މައްސަލައާ ގުޅިގެން އެ މުވައްޒަފު ވަޒީފާއާބެހޭ ޓްރައިބިއުނަލަށް ހުށަހެޅި މައްސަލައެއްގެ ތެރެއިންނެވެ. މި މައްސަލަ ވަޒީފާއާބެހޭ ޓްރައިބިއުނަލުން މިހާރު ނިންމައި، އެ މުވައްޒަފަށް އަލުން އަނބުރާ ވަޒީފާދޭން އަންގާފައިވާއިރު، އެ މައްސަލައިގެ ތެރޭގައި މުވައްޒަފު ދީފައިވާ ބަޔާން ޑީޖޭއޭއިން ބަދަލުކޮށްފައިވާ ކަމަށާއި، އެއީ ވަރަށް ނޭދެވޭ ކަމެއް ކަމުގައި ވަޒީފާއާބެހޭ ޓްރައިބިއުނަލުން ނިންމި ނިންމުމުގައި ބުނެފައިވެއެވެ.
ޑީޖޭއޭއިން މުވައްޒަފުންގެ ތަހުގީގު ބަޔާން ބަދަލުކޮށް މުވައްޒަފަކު ވަޒީފާއިން ވަކިކުރި މި މައްސަލަ ނިންމާފައިވަނީ އޭނާއަށް އަލުން ވަޒީފާދޭން ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ މައްޗަށް އަމުރުކޮށެވެ.
މި މައްސަލައިގެ އިތުރުންވެސް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން މުވައްޒަފުންނާ ގުޅޭ ބައެއް މައްސަލަތައް ގާނޫނުތަކާ ގަވާއިދުތަކާ ޚިލާފަށް ނިންމައި މުވައްޒަފުން ވަޒީފާއިން ވަކިކުރުމާއި އަދި އެ ނޫންވެސް ފިޔަވަޅުތައް އަޅާފައިވާ އެތައް މައްސަލައެއް ވަޒީފާއާބެހޭ ޓްރައިބިއުނަލުން ބަލައި އެ މުވައްޒަފުންނަށް އަލުން ވަޒީފާދޭން އަންގާފައި އެބަހުއްޓެވެ. އަދި މިއިން ކޮންމެ ފަހަރަކު އެތައް ލައްކަ ރުފިޔާގެ ބަދަލު ވެސް ދޭން ވެސް ޖެހިފައިވެއެވެ. އެއީ މުވައްޒަފުން ވަޒީފާއިން ވަކިކުރުމުގެ އަމަލު ކުރަން ޖެހޭ ގަވާއިދުތަކާ ގާނޫނުތަކާ އެއް ގޮތަށް އަމަލުކޮށްފައި ނުވުމުގެ ސަބަބުންނެވެ. އަދި މީގެ ބައެއް މައްސަލަތައް ޖޭއެސްސީން މިހާރުވެސް ހައިކޯޓުގައި އިސްތިއުނާފުކޮށްފައިވެސް އެބަހުއްޓެވެ.
ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނަކީ ޝަރުއީ ދާއިރާގެ މުވައްޒަފުންގެ އިދާރީ ކަންކަން އިންތިޒާމް ކުރުމާބެހޭ މައި އިދާރާއެވެ. އެއީ ރާއްޖޭގެ ހުރިހާ ރަށެއްގައި ގާއިމް ކުރެވިފައިވާ މެޖިސްޓްރޭޓް ކޯޓުތަކާ މާލޭގައި ހުންނަ ސުޕީރިއާ ކޯޓުތަކުގެ އިތުރުން ސުޕްރީމް ކޯޓާ ހައިކޯޓު އަދި ޖުޑީޝަލް އެކަޑަމީގެ އިދާރީ ބެލެނިވެރި ފަރާތެވެ.
