އެމްއެސްއެސް އިން މިހެން ބުނެފައި މިވަނީ، ރޭ ޕީޕީއެމް އިން ބޭއްްވި ޖަލްސާގައި ވާހަކަފުޅު ދައްކަވަމުން މާލެ ސިޓީ ކައުންސިލްގެ ހުޅުމާލޭ ދާއިރާގެ މެމްބަރު އިބްރާހިމް ޝުޖާއު ދެއްކެވި ވާހަކަފުޅަކާއި ގުޅިގެންނެވެ. 

ޝުޖާއު ދެއްކެވި ވާހަކަފުޅުގައި ވިދާޅުވީ، ކޮޗިން ފެރީގެ ސަބަބުން ރާއްޖެއަށް ލިބުނު އެއްވެސް މަންފާއެއް ފެންނާކަށް ނެތް ކަމަށެވެ. މީގެ އިތުރުން ޝުޖާއު ވިދާޅުވީ ކޮޗިން ފެރީއިން ރާއްޖެއަށް އެތެރެ ކުރަނީ އިންޑިއާ ސިފައިންނާއި އިންޑިއާ ސިފައިންނަށް ބޭނުންވާ ހަތިޔާރު ކަމަށެވެ.

މިވާހަކަ ތަކާއި ގުޅިގެން ރައްދު ދެއްވަމުން، އެމްއެސްއެސްގެ މެނޭޖިން ޑިރެކްޓަރު އަބްދުﷲ ސައީދު ވިދާޅުވީ، ބޯޓަށް، ހަތިޔާރު ދުވަހަކުވެސް އަރުވާފައި ނުވާނެ ކަމަށެވެ. އަދި ބޯޓަށް ކާގޯ އަރުވަނީ ކަސްޓަމުންނާއި، ބޯޑާ ކޮންޓްރޯލް އިން ބަލަންޖެހޭ ބެލުންތަކަށް ފަހު ކަމަށްވެސް ސައީދު ވިދާޅުވިއެވެ. 

އަދި ހަތިޔާރު އަރުވާ ކަމަށް ބުނެ ދައްކަނީ ހަގީގަތާއި ހިލާފު ވާހަކަ ތަކެއް ކަމަށެވެ. 

އިންޑިއާގެ ކޮޗިނުން ރާއްޖެ އަށް ދަތުރުކުރާ ފެރީ އަކީ އިންޑިއާގެ ޝިޕިން ކޯޕަރޭޝަން (އެސްސީއައި)ގެ ބޯޓެކެވެ. އެމްސީޕީ ލިންޒް ނަމަކަށް ކިޔާ 117 މީޓަރު ދިގު މި ބޯޓުގައި 3000 މެޓްރިކް ޓަނުގެ މުދާ އުފުލެއެވެ. އެމްސީޕީ ލިންޒްގެ ރާއްޖޭގެ އެޖެންޓަކީ އެމްއެސްއެސް އެވެ.

އިންޑިއާގެ ކޮޗިނުން ރާއްޖެއަށް މުދާ ގެނައުމަށް ކުރިއަށްދާ ދަތުރުތައް އިފްތިތާހުކޮށް ފުރަތަމަ ދަތުރު ކޮޗިނުން ކުޅުދުއްފުށްޓަށް ކޮށްފައިވަނީ ސެޕްޓެމްބަރު 26، 2020 ގައެވެ.