ޕްރެޒިޑެންޓްސް ކަޕްގެ ގަވައިދުގެ ހަތަރުވަނަ މާއްދާގައި ބުނެފައިވާ ގޮތުން މުބާރާތުގައި ވާދަކުރާ ކޮންމެ ޓީމަކުންވެސް މުބާރާތަށް ރަޖިސްޓްރީ ކުރާ އޮފިޝަލުންގެ ތެރޭގައި ކޯޗެއް ހިމަނަން ޖެހެއެވެ. އަދި ޓީމުގެ ކޯޗަކީ ދަށްވެގެން އޭއެފްސީ "އޭ" ލައިސެންސް ލިބިފައިވާ ކޯޗެއްކަމުގައިވާން ޖެހެއެވެ. ގަވައިދުގައި މިހެން ބުނެފައިވީނަމަވެސް ޕްރެޒިޑެންޓްސް ކަޕަށް ވެލެންސިޔާއިން ރަޖިސްޓްރީކޮށްފައިވާ ލިސްޓުގައި ކޯޗެއް ނުހިމެނެއެވެ.
ކޮންމެ މެޗަކަށް ރަޖިސްޓްރީ ކުރާ ޓީމު ލިސްޓު އެފްއޭއެމުން މެޗުގެ ކުރިން އަދި މެޗަށް ފަހު މެޗު ރިޕޯޓް މީޑިއާއަށް އާއްމު ކުރަމުންދާއިރު، މިއިން ކޮންމެ އެއްޗެއްގައިވެސް ވެލެންސިޔާގެ ޓީމު ލިސްޓުގައި ހިމަނާފައި އޮންނަނީ ތިން އެސިސްޓެންޓް ކޯޗުންނާއި ގޯލް ކީޕަރު ކޯޗެކެވެ. ޓިމުގެ ކޯޗެއް ނޯވެއެވެ. އެހެންކަމުން ޕްރެޒިޑެންޓްސް ކަޕުގެ ފައިނަލާ ހިސާބަށް ވެލެންސިޔާއިން ދަތުރުކޮށްފައިވަނީ މުބާރާތުގެ ގަވައިދާ ޚިލާފަށެވެ.
މިކަމާ ގުޅިގެން އެފްއޭމުން މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.
