ވެލާނާ އިންޓަރނޭޝަނަލް އެއަރޕޯޓްގައި ތަރައްޤީކޮށްފައިވާ އާ ރަންވޭ ވަގުތީގޮތުން ޓެކްސީވޭއެއްގެ ގޮތުގައި މިއަދު ހެނދުނު ބޭނުންކުރަން ފަށައިފިއެވެ.
އާރަންވޭގައި ފްލައިޓެއް
މޯލްޑިވްސް އެއާޕޯޓްސް ކޮމްޕެނީން ބުނީ އާ ރަންވޭ ޓެކްސީވޭއެއްގެ ގޮތުގައި ބޭނުންކުރަން ފެށުމާއިއެކު، އެއަރޕޯޓްގެ އޮޕަރޭޝަން މިހާރަށް ވުރެ ހަލުވިވެ ހަރުދަނާ ވެގެންދާނެކަމަށެވެ. އެގޮތުން މިހާރު ގަޑިއެއްގެ ތެރޭގައި 8 މަތިންދާބޯޓަށް ރަންވޭ ބޭނުން ކުރެވޭއިރު، މި ބަދަލާއެކު މިއަދަދު 16 މަތިންދާބޯޓަށް އިތުރުވެގެން ދާނެ ކަމަށާއި، އަދި ޕީކް ގަޑިތަކުގައި މިއަށްވުރެ ގިނަ މަތިންދާބޯޓަށް ހިދުމަތްދެވޭނެކަމަށެވެ.
އާރަންވޭގައި ބޯޓެއް ޖައްސާފައި
މިއާއިއެކު، ވައިގެ ތެރޭގައި ފްލައިޓް މަޑުކުރަންޖެހޭ ވަގުތު އެތައްގުނައެއް ކުޑަވެގެންދާނެ ކަމަށާއި، މިހާރުގެ ރަންވޭ، ޓެކްސީވޭއެއްގެ ގޮތުގައި ބޭނުންކުރަމުން ދިޔުމާއި އެކު މަތިންދާބޯޓެއް ޖެއްސުމަށްފަހު ރަންވޭ ހުސްކުރުމަށް ހޭދަވާ 10 ވަރަކަށް މިނެޓު، 2 މިނެޓަށް ކުޑަވެގެންދާނެ ކަމަށްވެސް އެމްއޭސީއެލްއިން ބުނެއެވެ.
އެހެންކަމުން އެމްއޭސީއެލްއިން ބުނީ އިތުރު މަތިންދާބޯޓްތަކަށް ރަންވޭއަށް ޖެއްސުމާއި ނައްޓާލުމަށް ހޭދަވާ ވަގުތު ވަރަށް ބޮޑަށް ކުޑަވެ ދަތުރުވެރިންނަށް އިތުރު ލުއި ފަސޭހަތަކެއް ލިބިގެންދާނެކަމަށެވެ. ވަގުތީގޮތުން ޓްކްސީވޭއެއްގެ ގޮތުގައި އައު ރަންވޭ ބޭނުންކުރަން ފެށި ނަމަވެސް ފްލައިޓް ޖައްސާ ފުރުމަށް މިއަހަރުގެ ތިންވަނަ ކުއާޓަރުގައި މިރަންވޭ ބޭނުންކުރަންފަށާނެކަމަށްވެސް އެކުންފުނިން ބުނެއެވެ. ބައިނަލްއަޤްވާމީ މިންގަނޑުތަކާއި އެއްގޮތަށް އެންމެ ބޮޑެތި ފަސިންޖަރ މަތިންދާބޯޓުތަކަށް ޖެއްސޭ ފެންވަރަށް ތަރައްޤީކޮށްފައިވާ މި ރަންވޭއަކީ 3400 މީޓަރ ދިގު އަދި 65 މީޓަރ ފުޅާ ރަންވޭއެކެވެ.
