ލަތާއަށް ފަރުވާކުރި ޑޮކްޓަރާއި ހަވާލާދީ ބޭރުގެ ނޫސްތަކުން ރިޕޯޓުކުރާ ގޮތުން ލަތާ މަރުވީ "މަލްޓިޕަލް އޯގަން ފެއިލިއަ" ގެ ސަބަބުންނެވެ.
ހާލުދެރަވެ ކުއްލިއަކަށް ލަތާ އައިސީޔޫގައި އެޑްމިޓުކުރީ މިދިޔަ ޖެނުއަރީ މަހުގެ ތެރޭގައެވެ. އައިސީޔޫގެ ވެންޓިލޭޓަރުގައި ފަރުވާދެމުންދިޔައިރު އޭނާއަށް ވަނީ ނިއުމޯނިއާއެކު ކޮވިޑް ވެސް ޖެހިފައެވެ.
އުމުރުން 92 އަހަރުވެފައިވާ ލަތާ އައިސީޔޫގައި އެޑްމިޓްކުރިއިރު ކޮވިޑާ އެކު ނިއުމޯނިއާ ވެސް ހުރުމުން އެއީ ފުރާނައަށް އޮތް ނުރައްކަލެއްގެ ގޮތުގައި ފާހަގަކޮށް ގިނަ ބަޔަކު ލަތާގެ ސިއްހީ ހާލަތާ މެދު އޭރު ވެސް ކަންބޮޑުވުން ފާޅުކުރިއެވެ.
ލަތާގެ ސިއްހީ ހާލަތާއި ބެހޭ އެންމެ ފަހުގެ މައުލޫމާތު ދެމުން އާއިލާއިން އޭގެފަހުން ޖެނުއަރީ މަހުގެ 12 ވަނަ ދުވަހު ބުނެފައިވަނީ ލަތާގެ ހާލު ރަނގަޅު ކަމަށާއި ކޮވިޑްއާއި ގުޅިގެން މާބޮޑު އަސަރެއް ލަތާއަށް ކޮށްފައި ނުވާކަމަށެވެ.
ނަމަވެސް އުމުރުން ދުވަސްވެފައިވުމުން ޑޮކްޓަރުން ލަފާދީފައިވަނީ އައިސީޔޫގައި ބާއްވައިގެން ފަރުވާދިނުން ކަމަށްވާތީ އޭނާ އަށް ދިޔައީ އައިސީޔޫގައި ފަރުވާދެމުންނެވެ. އޭނާ މަރުވެފައިވަނީ މިއަދު ހެނދުނެވެ.
ލަތާ އަކީ އިންޑިއަން ސިނަމާތަކުގެ ރަން އަޑުގެ ވެރިޔާއެވެ. އޭނާ ވަނީ މިހާތަނަށް 1000އަށްވުރެ ގިނަ ފިލްމުތަކަށް ލަވަ ކިޔާދީފައެވެ. އަދި 36 ބަހުރުވައިން އޭނާ ލަވަ މިހާތަނަށް ރެކޯޑުކޮށްފައިވެއެވެ.
